محمد سقراط-كود///

دابا واحد كيكون متهم بالإغتصاب كيجي واحد صاحبو ويقوليك لا فلان مايديرهاش… باش عرفتيه؟ إلى ماجربش يغتاصبك هذا كيعني أنك ماداخلش فالنوع لي كيعجبو مكيعنيش هو ماشي مغتصب، أخطر المغتصبين في التاريخ راه مكانوش وحوش وخايبين وممربيينش بل كانو ناس مثقفين محترمين عندهم كاريزما وسمعة، تيد بندي راه بقات مرتو متيقة أنه بريئ بل جات وحدة وتزوجات بيه وولدات معاه وهو مدان، وكذلك بزاف ديال المغتصبين والسفاحين والمجرمين بصفة عامة راه معندهمش شكل خاص بشع كيخليهم باينين مغتصبين من اللول وغير كتشوفهم وكتقلب الطريق، المجرمين المقودين هوما هادوك لي شكلهم كيخليك تقرى فيهم الأمان، والإغتصاب راه هو الغاية والهدف وماشي تعويض على حرمان جنسي، وماخاصش الواحد حتى يكون مكبوت عاد يغتاصب، أغلب المغتصبين المتسلسلين في ميريكان مثلا راه مزوجين وبولادهم وناس محترمين في المحيط ديالهم.

هادوك لي كانو كيضحكو على البنات لي قالو سعد مايديرهاش هوما نيت أول وحدين قالو علي ابيضار مايديرهاش علما أن التحقيق ديال البوليس والقضاء باقي ماقالش كلمتو هوما قدموا صكوك البرائة لصاحبهم غير حيت كيعرفوه، إذن راه مكاينش فرق بينهم وبين ديك ختنا ديال أمبوسيبل لي ضحكو عليها كاملين، وبين دوك لي قالو بلي سعد بوكوص وعندو الفلوس وتاوحدة ماتقوليه لا، ومايحتاجش يفرض راسو صحة على شي وحدة أي وحدة بغاها تجيع ندو طايرة، راه نفس هاد الهدرة تقالت على أبيدار أنه شاب بوكوص متخلق قاري وواعي وناشط وأن هذا غير إتهام من طرف أعداء النجاح ومؤامرة وداك الهدرة ديال والو، هذا كيبين أن المغاربة بالقاريين بالمكلخين بالأميين بالحداثيين بالرجعيين عبارة على قبايل كلها كيدافع على أفراد قبيلتو ظالمين أو مظلومين.

ماذا لو كان جواد الأنصاري هو لي تاهماتوا شي وحدة بالإغتصاب؟ الأغلبية غادي يقولوا يديرها حيت ولد سيدي الزوين وماقاريش وغادي يبداو يحسبو إحتمالات حصوله على نيكة رضائية وغادي يحكموا عليه مسبقا بصعوبة الأمر، إذا يديرها صحة مادام أنه ماقادرش يجيبها بالخاطر، ولكن في الحالة ديال علي أبيدار بما أنه شاب بوكوص وقاري ويوتوبر عتيق فحتى دوك الدراري لي فيهم الضو مشاو كيجريو وعطاوه البرائة بحالهم بحال صحاب سعد مايديرهاش وبنفس المنطق، بلا مايسمعو حتى الطرف الآخر ولا روايتو وبلا مايتسناو القضاء شنو غادي يقول فهادشي، بحال الى الطيبوبة والظرافة والأخلاق كتمنع الواحد من أنه يكون مغتصب، أصلا هادشي لي كيتقال على المغتصبين ديما كانو الله يعمرها دار بحال دينيس ريدر خناق ويكيشيتا.