عمـر المزيـن – كود – مكتب الرباط///

نايضة وكلشي فرحان كيصحاب ليهم “الڤاكسان” ديال كورونا وصل من الشينوا. هاد الشي فيه شوية الحقيقة ماشي كلها. اللي وقع وفق مصدر “كود” ان طيارة كارگو جابت بصاح البارح مواد طبية وفيها عينة من “الڤاكسان” الصيني. وصلات لمطار محمد الخامس فكازا.

ولكن هاد العينة دارت بيها “محاكاة” سيميلاسيون على العملية كيفاش غادية تكون. هاد المرة هاد المحاكاة وفق مصدر “كود” كانت حقيقية بعينات من الڤاكسان. عملية مماثلة كانت دارت هادي مدة ولكن ماشي بعينات بصاح من الفاكسان.

وفق مصدر “كود” فان هاديك العينة تنقلات من الدار البيضاء للرباط باش يشوفو ظروف تنقيلها وكاع الامور المتعلقة باللوجيستيك.

لحد الان وفق مصدر “كود” كلشي مزيان خاصة ان اللقاح الصيني ما محتاجش لدرجة حرارة منخفضة بحال ديال فايزر. يمكن يدار فالثلاجة.

حسب ما علمته “كود” فانه من المتوقع توصل الدفعة الاولى من الفاكسان اللي غادية دار للناس فاخر الاسبوع.

من المتوقع ان هاد اللقاح يدار فوحدة التبريد فبنمسيك حدا مارشي كريو فكازا

يشار إلى أن عملية تلقيح المغاربة بهاد الفاكسان اللّي كان المغرب طلبو من الصين غادي تكون على مراحل. وغادي تستهدف في مرحلتها الأولى العاملين في الصفوف الأمامية والتي تشمل القطاع الصحي من أطباء ممرضين تقنيين وإداريين والعاملين في قطاعات إستراتيجية من قوات الأمن الدرك الملكي والجيش والقوات المساعدة والعاملين بقطاع التربية الوطنية.

كما ستشمل الأشخاص المسنين والفئات الهشة للفيروس، وذلك قبل توسيع نطاقها على باقي الفئات حسب السن.