محمد سقراط-كود///

فقط انك تشوف مغاربة دايرين الصف هذا في حد ذاتو حدث مهم، إييه بزاف ديال المدن ولاو كيشدو الصف على الطاكسيات أو فالإدارات، ولكن لحد الآن باقي الفكرة مادخلاتش فراس المغاربة، وباقا القفوزية هي كيفاش تقضي غاراضك بلا ماتشد الصف ، وباقي بنادم كيبقى يقلب على المعارف فشي إدارة لي يسربيوه ويسبقوه بلا صف، بلا منهدرو على داك خونا لي كتكون شاد النوبة فمخبازة ولا حانوت وكيجي هو من اللور وبالجهد كيطلب شي لعيبة باش يتسربى دغية، زعمة حيت معندوش السخرة كثيرة فراه هانية، أو حيت زربان فراه من حقو، على أساس أن الناس لخريين مساليين راسهم جاو يجمعو مع مول الحانوت ماشي يتقداو.

ولكن للأسف نهار المغاربة كيديرو الصف كيخرج شي فهايمي أو فهايمية ويقولو ليهم لعيالات بوحدهم والرجال بوحدهم، على أساس إلى تخلطو في صف واحد غادي يديرو الولاد، حقا كاين التحرش كثير فالفضاء العام، وكاين المعتدين جنسيا والسمايرية والبوانتورة موجودين فالسواق والطويسات وكاع بلاصة الزحام راه خطر على المراة فالمغرب، ولكن راه الحل ماشي هو الفصل بين الجنسين باش تكون زعمة لمرة فراحتها، راه العكس خاص الإختلاط من الصغر باش يكبر بنادم وعارف ان الجنس الآخر راه ماشي هدف جنسي متنقل، خاص غير نلقاوه حدانا نحاولو نركبو عليه ولو غير بكليمة.

البلدان لي مافيهاش الإختلاط هي أكثرهم كبتا وتخلفا وعنفا ضد المرأة، أففانستان وإيران وباكستان والسعودية ودول إسلامية أخرى مانعين الإختلاط فراه وضع المراة فيهم باين، وحتى شي مرة ماغادي تبغي تعيش تم، وحتى شي واحد من هادو لي كيهللو دابا بمنع الإختلاط ماغادي يبغي يمشي يعيش فأفغانستان، حيت بقوة الإختلاط نادر تما عاطيين صلية لنكاح الغلمان، العالم المتحضر راه رسم طريق التحضر هادي مئات السنين ، إيما يمشي فيها الواحد ويرضى ويقبل بدوك القوانين لي تسطرو فيها، غما غادي يبقى خارج الزمن غارق فالتاريخ، وهاد دعاة عدم الإختلاط باغين يردونا لعصور الظلام بدعوى الحشمة والوقار والإحترام.