هناء ابو علي – كود//

ماشي غير فالمغرب، ظهرات واحد القضية فجأة ودون إنذار، ناس دارو السبنوسورينگ، تعراو، تعوجو، وشوية تصدرو المشهد على أساس أنهم مهمين ومؤثرين، فاش؟ الله أعلم؟ علاش؟ تا واحد مازال معارف؟ وايمتا غيسالي هادشي؟ هادي عارفينها، لكاع الناس مبقاوش كيهتمو بيهم، لهذه الأسباب:

1 – ميمكنش تبع انسان مكيدير والو فنهارو
كيفاش غيأثر فيك إنسان مكينتج تا حاجة فالنهار، وكيتسناك نتا دخل تشوف فيه باش هو يدخل الفلوس؟ اه راه لا مدخلتيش وشفتي و ت ابونيتي، ميمكنش يكون هاد ” المؤثر ” موجود.

2 – مؤثرة هادفة لا توجد
كولهوم ا ختي تيقلبو يدخلو لشي حدث فابور وياكلو ويشربو ويسافرو، ديها فقرايتك نتي حسن منهوم.

3 ميمكنش يكون التأثير هو كونط فانستگرام
اللي كيأثر كيكون موجود فالحياة، ماشي فستوري ديال اسنتگرام ولا ففيديو ديال دقيقة ونص.

4 التأُثير ولا هو الابتزاز
صيفطي ليا السلعة ديالك ولا ندوي عليها خايب، نموذج ديال هاد التخربيق، شكون نتي باش ديري الإشهار أصلا؟

5 السعاية
قوافل ديال البنات كيتلاحو على شي ماركة ملي يلاه كتحل فالمغرب، سيري عندهوم للمحل بلا متشوهي راسك قدام الآلاف المؤلفة.

6 بسبابهوم ضعنا فكيم كاردشيان ديال الخميسات
المؤثرة الحقيقية والوحيدة اللي كانت فالمغرب خرجو عليها ودارت الحجاب كاع.

7 باغين يدخلو للصحافة صحة
ميمكنش تولي صحفية حيت درتي العكر الفلاني وعجبك، نوضي تقودي بعدي منا.

8 المؤثر الوحيد فحياتك هو نتا
سمعتي أخويا ولا ختي، نتا الوحيد اللي قادر تبدل حياتك، وهاد التغيير غيبدا ملي غتوقف ولا توقفي تبعي بحال هاد النمادج الفاشلة، اللي بسبابنا ولات كتصدر المشهد.