كود الرباط//
أفرز “تسونامي 8 شتنبر” مشهد سياسي جديد وتكتلات حزبية لم تستطيع التأقلم بعد مع موقعها (المعارضة، الأغلبية)، وهو ما يظهر جليا في جلسات مساءلة الحكومة بمجلس النواب، إذ يصعب التمييز بين المعارضة والأغلبية خصوصا في ظل تراجع الخطاب السياسي لدى المعارضة مقابل تحالف ثلاثي يقود الحكومة بأغلبية عددية قوية.
“كود” اختارت دير “حوارات البرلمان” مع الفرقاء السياسيين بمجلس النواب، تسولهم على تراجع “السياسة” وضعف العمل البرلماني وغياب معارضة قوية، وشكون يقدر يدير معارضة قوية بلا بوليميك، وعلاش الحكومة مسيطرة على التشريع.
فالحلقة الأولى استضفنا فيها رئيس الفريق الحركي ادريس السنتيسي، لي كان رئيس مجلس النواب سابقا.
السنتيسي هضر على أزمة المعارضة واعطاء فرصة للحكومة فاش دوز 100 يوم، واعتبر بلي الحكومة معندهاش حلول واعتمادات مالية باش توفر مناصب الشغل، واصفا برنامج فرص بـ”الترقيعي” وكيشبه الانعاش الوطني.
السنتيسي علق على نهاية مسار العنصر على رأس الحركة الشعبية، وقال بأن زمن العنصر مغاديش يسالي وغايبقا حضور قوي فالحزب، وقال كذلك بلي مغاديش يترشح لخلافة العنصر.
واليكم نص الحوار:
“كود”: نبداو بالوضع الصعب للمقاولات فالمغرب وافلاس السياحة..علاش مدرتوش معارضة قوية للحكومة وترافعو بقوة على هاد الملايين من الاسر المتضررة؟
السنتيسي:
هذه أزمة دولية وليست فقط وطنية، ولكن معالجتها كتوقف على الابتكار لمواجهة الاثار السلبية للجائحة على المواطنين والمقاولات.
المقاولات في حالة وفاة إكلينيكية، أو كيموتو فصمت، إذن ما العمل؟. حنا كنقولو خاص تفعل القانون التنظيمي لقانون المالية، ولي كيعطي امكانيات دستورية وقانونية باش تفتح اعتمادات مالية لمواجهة هاد الازمة بحلول استعجالية. بغاية مواكبة المقاولة للحفاظ على فرص الشغل.
“كود” مقاطعا: الحكومة كتقول بلي وفرات 45 مليار درهم لدعم المقاولات واش ماشي خطوة مهمة هادي؟
هذا مبلغ محترم ومزيان، ولكن من خلال أجوبة الوزيرة فالبرلمان، بخصوص 50 الف فرص شغل ووغيرها من البرامج لي مزال مدار منو تا حاجة. حنا مبغيناش نسبقو 100 يوم وعطينا الفرصة الحكومة.
“كود”: اليوم كاين حديث على فقدان الأمل من المعارضة في ظل اغلبية قوية..كيفاش غاترجعو لهاد للمعارضة البرلمانية الوهج؟
السنتيسي:
الآن كاين صراع، الحكومة كطلب 100 يوم وكتقول بلي هاد قانون المالية الحالي حطاتو الحكومة السابقة، بالرغم من أن وزيرة المالية قالت بلي حنا جينا نديرو قطيعة مع الحكومات السابقة.
لحد الآن ماحد مكاينش منتوج حكومي قوي، ميمكنش نهضرو على معارضة أمام اغلبية عددية هائلة. مع العلم أننا كفريق فالمعارضة جبنا عدد من مقترحات قوانين وباجتهادات تشريعية مهمة.
للأسف الأغلبية مسيطرة، ومبغيتش ندير البوليميك ونسميوها اغلبية “مهيمنة”، بالعكس حنا بغينا نديرو معارضة وطنية.
دبا السؤال: هو كيفاش نردو مليون مواطن فقد الشغل فهاد عامين، خاصنا حلول.
“كود”: ولكن الحكومة جابت بدائل فحال برنامج أوراش؟
السنتيسي:
برنامج أوراش كيشبه “الإنعاش الوطني” ، ومكاين تا فرق بيناتهم.. اوراش فحال يلا بغا يصبغ طروطوار ولا الحيط نسميوه اوراش.
الحكومة كتقلب على حلول قصيرة الامد، ومشات لحلول ترقيعية مؤقتة، ولكن ميمكنش تحل ليه مشكل.. وهذا لي كاري شنو دير معه هاهو عاونتيه يخلص الكرا والمدرسة والتطبيب وو شكون يخلصو.
“كود”: بهاد الموقف لي عبرتي عليه..واش فنظرك الحكومة قادرة تنزل الورش الملكي ديال الحماية الاجتماعية؟
السنتيسي:
بصراحة صعيب بزاف.. ولكن واخا نتكلمو على الحكومة ووزرائها لي كنعرفوهم ناس مزيانين ولكن البرنامج الحكومي ضعيف.
خصنا دبا انطلاقة قوية وبرنامج مجتمعي.. حيث ميمكنش تقبط ثلاثة مكونات فأسبوع ويخرجو برنامج موحد رغم اختلاف مرجعياتهم.
الحكومة واحلة ومعندهاش اعتمادات مالية، اضافة الى ارتباك في الهيكلة والتخلاط في القطاعات والحاق الرياضة بالتعليم الأولى وغيرها من الارتباك.
“كود”: بعيدا عن العمل الحكومي..اليوم كولشي كيهضر على ترسيم السنة الامازيغية، علاش تأخر فهاد القرار؟
السنتيسي:
رئيس الحكومة سبق اعلن ف التزاماته فالحملات الانتخابية، انه يدافع على الامازيغية، وحنا فهاد السياق خدامين ودرنا مقترحات وغانديرو يوم دراسي بمناسبة رأس السنة الامازيغية.
حنا اقترحنا نديرو توصيات باسم جميع الفرق البرلمانية بدون حسابات سياسية. بغينا ندوزو لأمور عملية.
“كود”: الحركة مقبلة على مؤتمر جديد..واش سالا زمن العنصر لي عمر سنوات طوال فالحزب؟
السنتيسي:
زمن العنصر لن ينتهي، هو صرح بأنه مغاديش يترشح للأمانة العامة وغايبقا مناضل فصفوص الحزب. كاينا رغبة لدى الجميع لانتخاب مكتب سياسي جديد بوجوه شابة.
“كود”: واش غادي ترشح للأمانة العامة لخلافة العنصر؟
السنتيسي:
لن أترشح، هذا قراري واخا انا من قيدومي الحركة اشلعبية.. نتمنى القيادة الجديدة يكونو فيها شباب وشابات.
