عفراء علوي محمدي- كود//
دارالطيب حمضي، الطبيب الباحث فالنظم الصحية والسياسات الدوائية،دار نداء للمواطنين فوق سن الأربعين، باش يديرو التلقيح ضد فيروس كورونا المستجد.
وقال حمضي أن اللقاح كحمي من المرض والحالات الخطرة والوفاة بشكل كبير، بحيث كمثال على بريطانيا وروسيا، اللي عندهم متحور ديلتا، فبريطانيا خداو أكثر من 66 فالمية من السكان جرعة وحدة على الأقل من اللقاح، وأكثر من 50 فالمية خداو جوج جرع، اما روسيا خداو غير 15 فالمية اللقاح، وكنتيجة لهذشي: بريطانيا كتسجل من 6 حتى ل10 وفيات يوميا، بينما روسيا كتسجل بين 600 حتى ل700 حالة وفاة.
وزاد حمضي ان التلقيح يقلل من انتقال وتفشي الفيروس، حيت الأشخاص غير الملقحين كيدوز ليهم الفيروس 12 مرة أكثر من اللي دارو الجلبة.
وكشف حمضي أن 99,2 فالمية من الوفيات الأخيرة فكورونا فميريكان كانت للناس اللي ماملقحينش، وهذي قالو الدكتور أنتوني فاوتشي، المستشار الطبي للبيت الأبيض والأخصائي الأمريكي الرائد في الأمراض المعدية.
وعلى هذشي، وجه حمضي هذ النداء للناس اللي فوق 40 عام، واللي عندهم امراض مزمنة، واللي مازال ماتلقحو، “زربو وديرو التلقيح، راه كيحمي صحتكم وحياتكم وكيقلل من احتمال نشر الفيروس بين اسركم وداخل المجتمع”.