نهضة بركان غيمشيو من مطار الجزائر للوطيل يرتاحو والكاف عطاهم ضمانات على التونيات
كود سبور//
صام الدولي المغربي عبد الرزاق حمد الله على تسجيل الأهداف فالماتش اللي جمع الفريق ديالو إتحاد جدة بالنصر، مساء أمس الأحد ضمن منافسات الدوري السعودي.
حمد الله وفالقمة ديال البطولة السعودية، تلف الطريق إلى المرمى فماتش غابت فيه الحلول على النجم المغربي، اللي أغلب الثنائيات خسرها قدام الحصار والمراقبة اللي داروها عليه الزملاء ديالو السابقين فالنصر السعودي الفريق اللي كان كيلعب فيه من قبل.
الماتش ما بين إتحاد جدة والنصر ما غلب فيه حد، وسالا تعادل زيرو لزيرو، وحمد الله غاب على زيارة المرمى وهذا أمر عادي بالنسبة لأي لاعب، حيث أي مهاجم يقدر يزكل ولا ما يكونش فنهارو فواحد الماتش، لكن الغريب فالأمر هو غياب هاذيك لومبيونس على مواقع التواصل الاجتماعي ملي كيكون حمد الله مسجل، وكايبداو المؤمنين بنظرية المؤامرة فالترويج للاسم ديالو على نطاق واسع على أنه المهدي المنتظر ديال المنتخب المغربي اللي غيحيد لعكس لهجوم ديال ليكيب ناسيونال.
عدد من المتتبعين ديال المنتخب المغربي ومن بعدما حمد الله ما قدرش يسجل على النصر وتحصل ثاني أضعف تنقيط فالماتش بمعدل 5.8، تساءلوا فمواقع التواصل الاجتماعي على السبب “واش حيث النصر فريق مزيان والفرق الأخرى اللي كيماركي عليها حمد الله فالبطولة السعودية كتكون أغلبها ضعيفة؟”، وأكدوا على أن هذا هو السؤال اللي خاص يتطرح حيث إذا حمد الله صام على التسجيل مع الفريق ديالو إتحاد جدة راه ممكن يصوم حتى مع المنتخب ويضربها برا الشبكة وهذا راه وارد لأنه حتى لعاب فحال كاع لكوايرية.
عدد كبير من المغاربة كيطالبو الناخب الوطني وليد الركراكي باستدعاء عبد الرزاق حمد الله للمنتخب باش يحل مشكل العقم الهجومي بناء على المردود ديالو مع إتحاد جدة، ومتعاطفين معه بشكل كبير، وكاين واحد الفئة كتشوف على أن حمد الله خاصو ياخذ الفرصة ديالو لكن الاستدعاء ديالو ليكيب ناسيونال ما كيعنيش أن اللاعب كيملك حلول سحرية، حيث ممكن يفشل فأول ماتش بسبب الضغط الكبير هاذشي اللي وقع مع لاعبين آخرين فحال يوسف النصيري وايوب الكعبي وغيرهم اللي ملي كيجيو للمنتخب كيزكلو الكفاف ديال لبيوت ومع فرقهم كيماركيو.