علي الصافي العيون ///

خلال الندوة الصحافية لاختتام المفاوضات اللي رعاها كوهلر مبعوث الامين العام للامم المتحدة المكلف بالصحراء بحضور الجزائر والمغرب والبوليساريو وموريتانيا فجنيف٬ سأل صحافي من البوليساريو وزير الخارجية المغربي ناصر بوريطة عن امور منها تمثيلية الوفد المغربي في اشارة الى رئيسي جهتي الداخلة والعيون الخطاط ينجى وحمدي ولد الرشيد =الصغير= بالاضافة الى منتخبة فاعلة جمعوية من السمارة. صحافي البوليساريو شدد على ان للصحراويين ممثل وحيد هو البوليساريو الممثل في الاتحاد الافريقي. وزير الخارجية والتعاون رد عليه بالحديث عن الشرعية الحقيقية يمثلها الوفد المغربي لانهم انتخبوا في انتخابات ديموقراطية اقرت بنزاهتها الامم المتحدة وشهدت مشاركة 80 بالمائة. واكد “الشرعية لا تدعى بل لها شروط” وهي المنافسة الديموقراطية وهاد الشي كاين فالمغرب ماشي فالمخيمات.

هاد الفكرة اللي جسدها على ارض الواقع حمدي ولد الرشيد منسق الجهات الثلاث للصحراء لحزب الاستقلال والقيادي الاقوى فحزب علال الفاسي وعمدة العيون في تجمع تاريخي للحزب بساحة المشور بالعيون السبت الماضي. حضر اكثر من 50 الف فهاد التجمع. طبعا ما جاووش على قبال حزب الاستقلال٬ بل على قبال حمدي ولد الرشيد. حضرات قبائل مختلفة ماشي غير اركيبات =قبيلة عمدة المدينة. ولد الرشيد بين باللي تمثيل الوفد المغرب فالمفاوضات مع الجزائر والبوليساريو وموريتانيا بجوج رؤساء الجهات من حزب الاستقلال ماشي غير هاكاك بل ان هاد الحزب هو الاقوى. فالحقيقة الاقوى هو ولد الرشيد هو ذهاؤو السياسي هو قدرتو على الحضور المستمر فالمشهد السياسي بالصحراء.

حمدي ولد الرشيد ومعاه ال الرشيد كان حاول فؤاد عالي الهمة باش يالله بدا يتحرك فحزبو اللي اسسو مع يساريين ويمينيين “البام”٬ كان دار تجمع حزبي حدا اوطيل النگجير. وعد باش يحيد الضراس اللي كيعيقو التنمية ووو فالصحرا بالكلاب. ما عمر الكلاب خدم واللي وقع بعد دخول اكثر والي فالعيون خدم البام وهو گلموس دخل فمواجهة سالات باكديم ازيك. زاد ولد الرشيد تقوى. قوتو فانو خدام فالارض. ديما حاضر. ما عمرو خوا التيران. كلشي اللي كانو فالصحرا عياو ومشاو من الاعيان و… حقاش ما كيحطوش مؤخرتهم فالمدينة. ديما مسافرين.

ولد الرشيد من الستة الصباح تلقاه كيدور فالمدينة. مقابل الشادة والفادة. متبع كلشي وخدام ليل ونهار. دابا عندو حزب الاستقلال من نهار جاب نزار بركة وبسبابو طردو حميد شباط من الحزب. اييه حليفو السابق باش سالات مهمتو طردو ولد الرشيد.

ولد الرشيد ما عمر الدولة. كنقصدو على مؤسساتها ماشي كاع المؤسسات٬ كانت تايقة فيه. جهات ديما حذرات منو. هاد الجهات اللي كانت رفضات استوزار رئيس جهة العيون الساقية الحمراء فحكومة عباس الفاسي.

ولد الرشيد حيح فالعيون. رسالتو لكلشي. للبوليساريو فيها ان ولد الرشيد هو المعادلة الاهم فشي حل مستقبلي. نفس الرسالة للمغرب. للاحزاب السياسية اللي طامعة تربح انتخابات فالصحراء. ماشي بعيد غدا يلتحق بيه رجل كلميم القوي عبد الوهاب بلفقيه الاتحادي اللي عندو مشاكل مع ادريس لشكر. بهادي ولد الرشيد غادي يوضع اليد على كاع الجهات: كلميم والعيون والداخلة