الرئيسية > آش واقع > حلقات “اجي تعرف صحتك” على “گود”.. الحلقة 2″بوصفير عرض ماشي مرض”: واش إلى جا ومشا راني صحيت منو ولامزال حامل للمرض؟ والعشوب والكويان واش كيداويو منو؟
11/09/2021 18:30 آش واقع

حلقات “اجي تعرف صحتك” على “گود”.. الحلقة 2″بوصفير عرض ماشي مرض”: واش إلى جا ومشا راني صحيت منو ولامزال حامل للمرض؟ والعشوب والكويان واش كيداويو منو؟

حلقات “اجي تعرف صحتك” على “گود”.. الحلقة 2″بوصفير عرض ماشي مرض”: واش إلى جا ومشا راني صحيت منو ولامزال حامل للمرض؟ والعشوب والكويان واش كيداويو منو؟

إعداد د: جيهان الحدادي ــ كود الرباط//

بوصفير أو إصفرار العينين والجلد و الفم ولا غي العينين حسب الحدة ديالو هو عرض كيدخل مع أعراض أخرى فبزاف الامراض بحال فقر الدم الانحلالي و التهاب الكبد الفيروسي و اورام الكبد و انسداد القنوات المرارية و غيرها، اذا هو ماشي مرض قائم بذاتو كيف ما كيظنوا الناس . بوصفير كيبان عند المريض فاش كمية البليروبين فالدم كترتافع عن الطبيعي.

شناهوا  البليروبين؟

كريات الدم الحمراء من بعد مكاتنتج فالنخاع العظمي كتعيش حوالي 4 أشهر من بعد كتفتت و تحلل و كينتج على هاد العملية مجموعة من المواد لكانوا كيساهمو فتكون هاد الكريات منهم واحد المادة صفراء لكتسما بالبليروبين هاد المادة لكتكون غير متحولة( غير مباشر) كتنقل من بعد  للكبد باش يتخلص منها عن طريق تحويلها لبيليروبين متحول (مباشر ) فالخلايا الكبدية باش يسهال عليه يفرزها مع الصفراء فالقنوات المرارية و من بعد باش يخزنها فالمرارة و بعد فالامعاء عن طريق القنوات المرارية الرئيسية لكتوصل الكبد و المرارة بالامعاء و البنكرياس و ملي كتمشي الامعاء يتم استخراجها مع الفضلات و كتساهم فاللون ديالها .

كيفاش كيوقع ارتفاع البليروبين و بوصفير؟

كينين 3 الاليات لكيعطونا 3  مراحل فكل مرحلة كينين العديد من الامراض:

الالية الاولى هي مرتبطة بالمرحلة الاولى وهي فاش كيتم ارتفاع انتاج البلبروبين وهنا الحالة الاكثر شيوعا هي فقر الدم الانحلالي فكتحلل كريات الدم قبل متكمل 120 يوم

الالية الثانية مرتبطة بالمرحلة الثانية فاش كيدوز البيليروبين الكبد و كيلقا بلي فيه مشكل و هنا الكبد كيكون عاجز اما انه يمسك بالبيليروبين المنقل ليه و لا يحولوا للشكل المباشر و لا مشكل فرزو من الخلايا الى القنوات المرارية.

الالية الثالثة مرتبطة بالمرحلة الثالثة هنا البيليروبين كيوصل الكبد فكيحولو و كيفرزو غير عندنا مشكل فالقنوات لمكتخليش هاد المادة لمخلطا مع مكونات الصفراء يدوزو المرارة من بعد الامعاء و بالتالي كيرجعو للدم اما بسباب حجرة و لا ورم ولا انسداد خلقي ولا مناعي لهاد القنوات …

شناهما الامراض الشائعة فكل مرحلة واعراضها؟

المرحلة الاولى كيف قلنا البليروبين الغير مباشر كثير فالدم و السبب لغنهدرو عليه هو فقر الدم الانحلالي لاما كيكون بسبب امراض وراثية وهنا خاصة عند الاطفال نذكرو فقر الدم المنجلي عند ذو البشرة السوداء و و ثلاسيميا او فقر الدم البحر الابيض المتوسط لكيكون شاءع فديك المنطقة و نقص G6PD ولي معروف بحساسية الفول.. و كينين امراض مكتسبة مناعية ولا بسبب شي دواء اولا الملاريا لناس لرجعو من سفر من المناطق الاستوائية ..

فهاد الحالة اما كيجينا بمشكل مزمن ديال بوصفير معاه شحوب وفاش كنقلبو المريض كنلقاو عندو ارتفاع حجم الطحال و لا كيجينا بمشكل حاد وهنا المريض كيجي بالم فاسفل الظهر و تغير لون البول و يقدر يجي بحالة صعيبة تحتاج الانعاش.

الامراض لكيهموا المرحلة الثانية هم امراض خاصين بالكبد، فيهم التهاب الكبد الفيروسي ،بحال فيروس الكبد أ لكتنقل عبر الماء و الاغدية الملوثة بفضلات حامل للفيروس خاصة عند الاطفال ،اما فيروس ب و س كيكون انتقال عبر الدم و العلاقات الغير الحمية، و هاد الفيروسات كيسبو ضرر فخلايا الكبد واعراضهم كيختالفو يقدرو ميبانوش ولا يبانو و هنا يقدر يسبق بوصفير السخانة الم مفاصل و الرأس و الم فالبطن و اسهال و يقدر يمر هاد بوصفير مرور الكرام ويجي المريض فمراحل متقدمة من المرض مع تليف الكبد .

كينين امراض مناعية و فهاد الحالة اعضاء اخرى يقدرو يتقاصو و المريض كيجي بعدة امراض بحال السكر و مشكل الغدة الدرقية و غيرها .

و كينين امراض وراثية لكتسبب فنقص ولا انعدام الانزيمات و البروتينات المهمة فتحويل البيليروبين و فرزو بحال متلازمة جيلبير و غيرها.

وبلاما نساو الاعشاب لكياخدهم المريض باش يحل مشكل x اولا y و هو معرفش بلي گاع الاعشاب راه كتمر بالكبد هو اللول و هنا ديك العشبة تقدر تحل داك المشكل ولكن كتهلك خلايا الكبد.

و كين استهلاك الادوية بطريقة غير مقننة و اشهرهم الباراسيتامول (دوليبران) لكيتخاد بجرعات كتناسب وزن المريض و خاص مدة 6 ساعات بين جرعة و جرعة باش الكبد يقدر يتخلص منو .

والكحوليات حتى هي كتعطي هاد المشكل.

و كين بوصفير حديثي الولادة لكيمشي فأقل من 10 ايام والا مامشاش خاص تدخل اخصائي بشكل مستعجل، و كين بوصفير الرضاعة و هنا فاش كنحبسو الرضاعة الطبيعية المشكل كيتحل ،و اسباب كتيرة عند الاطفال لنقدرو نتناولوها فمقال اخر.

و يعد تليف و تشمع الكبدي لهو سبب لبوصفي ونتاج لگاع هاد الاراض و اهمالهم هو الاخطر و هنا المريض كيجي باعراض خطيرة بحال تكون الماء فالبطن و تقيؤ الدم ..لمكتحل غي بزراعة الكبد

المرحلة الثالثة انسداد القنوات المرارية و هنا كيكون مشكل حجر فالمرارة لكتنقل و يسد القنوات خاصة النساء وهنا كيكون عندنا الم مزمن فالجهة اليمنى من البطن ليتزاد بعد الوجبات الدسمة ولكيعرف مضاعفات خطيرة فحالة لمكانش تدخل جراحي فاش الحجر كيكون محصور فالمرارة اما عند الناس الكبار الاورام هي الاكثر شيوعا وهنا كيكون تضهور صحي مع فقدان الوزن و الشهية و العياء و بوصفير كيكون كيتزاد بطريقة تدريجية هاد اورام تقدر تكون انتشرت من ورم فعضو اخر بحال الرئة ،و ولاورم خاص بالكبد و فالقنوات و لا فالبنكرياس، والتهاب البنكرياس و انسداد القنوات بسبب امراض مناعية حتى هما كيعطيو هاد المشكل. وهنا كيصاحب هاد بوصفير حكة و ابيضاض لون الخروج و تركيز لون البول

كيفاش كيتم التشخيص؟

فاش كيجي عندنا المريض كنسولوه على السن و الاصل ديالو واش عندو مشكل الحجر فالمرارة، واش خدا شي دوا ولا شي عشبة مؤخرا واش كيستهلك الكحول و لا شي مخدر و لا كيدير علاقات غير محمية و كنقلبو على الاعراض و على المضاعفات

من بعد التقليبة لكتكون شاملة و على حسب الامراض لشكينا فيهم من الاسئلة ديال المريض  كتجي مرحلة التحاليل المخبرية و كنقدو نحتاجوا نديرو

الفحص بالصدى ( التلفازة) و السكانير و bili IRM و نقدو نشتعمل منظار ولا ناخدو تحليلة من الكبد على حسب المرض لشكينا فيه

العلاج والوقاية؟

عرفنا دابا بعض اسباب الشائعة لبوصفير وكل مرض عندو العلاج الخاص بيه لكيقدر يكون من اتباع نظام غدائي خاص لاخد ادوية لتدخل الجراحي او زراعة الكبد وباش منوصلوش لهاد المرحلة  كنصح اولا نبعدو من العشوب ، الدوا يكون بوصفة الطبيب و لا بعد استشارة الصيدلي  و ابتعاد عن الشرب عن العلاقات الغير محمية و استعمال المخدرات بحال الهروين واستعمال الابر المستعملة و غيرها و فحالة وجود مرض وراثي لابد التتبع عند الطبيب متخصص عند الحمل و منذ الولادة باش لكان مشكل يتم التشخيص المبكر ،ولواحد لكان عندو مشكل لحجر يفتح عليه قبل حصول المضاعفات ولي عندو حساسية من دوا و لا شي مكونات خاص تجنبهم نهائيا واي بوصفير وخا غي جا و مشا وخا بان غي فبياض العين خاص تعرفو السبب ديالو حت يقدر يكون علامة علامة لمرض خطير كيتطور كيف يقدر يكون مشكل بسيط و التشخيص المبكر دائما راه فصالح المريض.

واش كاين دواء او وصفات طبيعية؟

كين لكيقول هاذ العشبة ولا مشيت كويت و لا خديت العسل و لا الحمص ولا الثومة.. و صحيت انا غنقول بلي بوصفير ماشي مرض لكين دوا واحد ليه هو عرض كيبان فعشرات و عشرات الامراض و كل مرض عندو دواه لمجرب علميا ومشي العشبة لفلانية هي لكتشافي گاع الامراض و حاجة اخرى بوصفير عرض كيعرف تطور بحال المرض المسبب ليه ففلتهاب الكبدي كيقدر ميكونش بوصفير و يقدر يكون و يمشي حت تطور المرض و المريض يگول راخديت هاد العشبة ولا كويت ولا.. وصحيت، و هي الكبدة غادة فالتليف و التشمع و هنا هادشي فاش كناخدوه راه كنحرمو راسنا باش نعرفو المرض و نداويوه قبل ميوصل المراحل المتأخرة لمن بعدهم مكيبقا دوا .

اذا اش غنستافدوا من هاد المقال ؟

بوصفير عرض كيقدر يبان فبزاف الامراض و مكينش غي التهاب الكبد الفيروسي كيف مروجين شي ناس الله يهديهم، كل مرض بدواه لمجرب علميا و هاد المرض لمشيتي عند الطبيب و قلبك و كتب ليك التحاليل اللازمة باش يعرفو غيتم اكتشافو بكري ويتشافا منو المريض دون حدوث اي مضاعفات اما لبقيتي عطي وذنك لهاذا و هذا فغيفوت بوصفير وتبقا حامل للمرض وغتكون فوتي على راسك علامة عطاها ليك الله باش تشافا

وهنا الوعي ضروري و الثقة فذوي الاختصاص مهمة باش نزيدو ببعضياتنا القدام و منضروش بعضياتنا بنصيحة مقدينش نتحملو تابعاتها.

موضوعات أخرى

29/03/2024 06:00

العراقي لي حرق القرآن فالسويد علق لبلاد خرا.. غادي يطلب فيها اللجوء بعدما قررات ستوكهولم تجري عليه