عفراء علوي محمدي- كود//
علنات وزارة الصحة على تسجيل 80 إصابة جديدة بفيروس كورونا المستجد فهذ 24 ساعة الأخيرة، أي من الستة دلعشية لبارح الجمعة حتى للستة دالعشية اليوم السبت، وهكذا وصل عدد المصابين فالمجموع لـ8151، أي بنسبة 22,4 لكل 100 ألف نسمة.
وقال معاذ المرابط، منسق المركز الوطني لعمليات الطوارئ العامة بوزارة الصحة، فالندوة اليومية للترصد الوبائي لفيروس كورونا المستجد، أنه تسجلات 47 حالة شفاء اليوم، ووصل المجموع لـ7315، ونسبة التعافي هبطات لـ89,7 فالمية.
وما تسجلات حتى وفاة اليوم، واستقر الطوطال ف208 ، أي بنسبة إماتة مستقرة ف2,6 فالمية.
والحالات النشيطة بلغ عددها 628 حالة، أي بمعدل 1,7 لكل 100 ألف نسمة.
وكشف المرابط أن جهة كازا سطات هي اللي سجلات أكبر عدد ديال الإصابات (46)، بسبب وجود 4 بؤر عائلية صغيرة وبؤرة صناعية، بينما سجلات جهة طنجة تطوان 14 حالة، وجهة مراكش آسفي 12 منهم 10 من البؤرة العائلية السابقة، وجهة الرباط 5 حالات، وجهة فاس مكناس 2 حالات، ثم الجهة الشرقية حالة واحدة، بينما الجهات الأخرى ماسجلات حتى حالة.
من هذ 80 إصابة اللي تسجلات اليوم، تم اكتشاف 74 عن طريق عملية تتبع المخالطين، وبلغ عدد المخالطين اللي تحت المراقبة دابا 7247 مخالط.
والوزارة استبعدات اليوم 14028 حالة إصابة بالفيروس، ووصل عدد الحالات المستبعدة فالمجموع لـ281306 بعد ما خرجات تحاليل هذ الحالات سالبة.
و87 فالمية من الإصابات كاينة فثلاث جهات: فجهة كازا سطات وجهة مراكش آسفي وجهة طنجة تطوان، بينما جوج جهات صبحو خاليين من الفيروس، وهوما جهة درعة تافيلالت وجهة الداخلة واد الذهب.
بالنسبة للحالات اللي كاينين فالإنعاش كيبلغ العدد ديالهم 18، أغلبيتهم كاينين فكازا (13)، 3 فمراكش، ووحدة ففاس، ووحدة فطنجة، ومن هذ الإصابات كاينين 5 تحت التنفس الاصطناعي.
وهذا التوزيع الجغرافي للإصابات بالنسبة المئوية:
