عفراء علوي محمدي- كود//

اليوم الأربعاء 3 يونيو، سجل المغرب ارتفاع ملحوظ فعدد حالات التعافي اليومية من فيروس كورونا المستجد، بحيث تشافاو فهذ 24 الأخيرة 456 حالة، ووصل المجموع ل6866 حالة، أي بنسبة 86 فالمية.

وبالتالي، بعدما سجل المغرب 1407 حالة شفاء فظرف ثلاثة أيام (72 ساعة)، مع إصابات قليلة بالفيروس، ولا عندنا غير 850 حالة تحت العلاج ، أي بنسبة 11 فالمية من مجموع الإصابات اللي تسجلو من نهار بان كورونا فالمغرب هذي 3 شهور.

وقال معاذ المرابط، مسؤول فوزارة الصحة، فندوة الترصد الوبائي لفيروس كورونا المستجد، أن اليوم تم استبعاد 13 ألف و117 حالة إصابة بكورونا خرجات تحاليلها سلبية، وهذا اليوم الثالث على التوالي اللي كيحقق فيه المغرب أعلى نسبة ديال الحالات نيگاتيف، ووصل عدد الحالات المستبعدة فالمجموع ل239 ألف و902.

بالنسبة للإصابات، تسجلات 56 إصابة جديدة، وهكذا وصل الطوطال ل7922. و51 من هذ الإصابات تم اكتشافو فإطار منظومة تتبع المخالطين، اللي شملات فالمجموع 47499، ولحد الساعة مازال 7456 دالمخالطين رهن المراقبة الصحية.

واليوم، ما تسجلات حتى وفاة ، واستقر عدد المتوفين ف206، وبقات النسبة حتى هي مستقرة ف2,6.

وبالنسبة لمؤشر توالد الفيروس، كشف المرابط أنه محدد ف 0,75 فالمغرب، لكنه كيختلف من جهة لأخرى، بحيث فجهة كازا واصل ل8، وجهة طنجة تطوان 3، جهة مراكش آسفي 1، وأقل من 1 فباقي الجهات، بينما جهات تخلصات بشكل كلي من الحالات النشيطة، وهي جهة درعة تافيلالت، الجهة الشرقية، وجهة الداخلة واد الذهب.

وهذا التوزيع الجغرافي للإصابات بالنسبة المئوية: