عفراء علوي محمدي- كود//

هذ الصباح، ماتسجلوش بالزاف دالإصابات بفيروس كورونا المستجد بالمقارنة مع الأيام اللي فاتو، بحيث تسجلو غير 146، وهذا كيدل على أن البؤر الوبائية بدات كتقل.

بالنسبة لتوزيع الإصابات فالجهات، جهة فاس مكناس سجلات اكبر حصيلة يومية (38)، وصل المجموع فيها لـ1460، تابعاها جهة العيون الساقية الحمرة ب34 إصابة جديدة، باش يوصل مجموع المصابين فيها لـ638، ثم جهة طنجة تطوان الحسيمة اللي سجلات هاد الصباح 26 إصابة، ووصل فيها المجموع لـ2571.

وبالنسبة للجهات الأخرى، كازا سطات سجلات 22 إصابة ووصل المجموع لـ3561، وجهة مراكش آسفي سجلات 14 ووصل المجموع لـ2063، ثم جهة بني ملال خنيفرة سجلات 8 إصابات ووصل مجموع المصابين فيها لـ153، وكلميم وادنون سجلات 3 ووصل مجموعها لـ83 والرباط سلا سجلات إصابة وحيدة ووصل مجموع الإصابات فيها لـ1994.

أما بخصوص باقي الجهات، فالحالة الوبائية فيها ماطرا عليها حتى تغيير، وبالتالي بقا مجموع الإصابات فدرعة تافيلالت ف585، فالجهة الشرقية ف211، فجهة سوس ماسة 92، وجهة الداخلة واد الذهب 15.

ولنا عودة مع باقي المعطيات الوبائية فالأقاليم والجهات بالتفاصيل فالعشية..