الرئيسية > آراء > حصريا على “كود”: سلسلة “كيفاش السلاطين ديال المغرب كايشوفو “ريوسهوم” وكايشوفو السلطة ديالهوم وكايحميوها؟ !” حلقة اليوم=الخلافة الفاطمية الشيعية”
20/03/2017 09:01 آراء

حصريا على “كود”: سلسلة “كيفاش السلاطين ديال المغرب كايشوفو “ريوسهوم” وكايشوفو السلطة ديالهوم وكايحميوها؟ !” حلقة اليوم=الخلافة الفاطمية الشيعية”

حصريا على “كود”: سلسلة “كيفاش السلاطين ديال المغرب كايشوفو “ريوسهوم” وكايشوفو السلطة ديالهوم وكايحميوها؟ !” حلقة اليوم=الخلافة الفاطمية الشيعية”

عبد اللطيف اكنوش استاذ باحث بجامعة الحسن الاول سطات ////

في الحلقة السابقة، شفت معاكوم قضية مراكز الخلافة الإسلامية للي كانت كاترتابط بيها الدول المغربية خلال القرون الثلاثة أو الأربعة بعد دخول العرب والمسلمين لإفريقيا الشمالية…واكتافيت بالحديث عن “خلافة بني العباس”…

في هاذ الحلقة غادي نحاول نشرح شويا بعض الجوانب من مركز خلافة آخر، وللي هو “الخلافة الفاطمية الشيعية”، على أمل أن أعود في الحلقة المقبلة لخلافة الأمويين السنة بالأندلس…
مركز الخلافة الثاني..خلافة الفاطميين…

لا بد مانشير هنا أن إعلان “عبد الرحمان الناصر لدين الله” الأندلسي الأموي، على قيام “الخلافة” الأموية “السنية” في قرطبة، كان في الحقيقة رد فعل سياسي وإديولوجي على قيام “الدولة الفاطمية” الشيعية الإسماعيلية في تونس شي 19 عام من قبل، أي في سنة 910 ميلادية ! لدرجة صبحات عندنا في إفريقية أي المغرب الكبير وإسبانيا جوج ديال “الخلافات”، وحدة سنية أندلسية، ووحدة شيعية إسماعيلية، مما يعني أن الصراع السياسي والإديولوجي غادي يكون حامي بين الطرفين، وهو صراع للي كان عندو أثر كبير بزاف على السلالات الحاكمة في الغرب ديالنا…

إذن “الخلافة الفاطمية” تأسسات رسميا في 910 ميلادية في تونس…وما فيها باس نذككر بالخطوط العريضة ديال تاريخ هاذ السلالة الفاطمية، وبلا تطوال…
هاذ خيياتي شيعة…والشيعة كيف ماكاتعرفو ثلاثة الأصناف، كاينة “الشيعة الإمامية أو الإثنى عشرية”، وكاينة “الشيعة الزيدية”، وكاينة “الشيعة الإسماعيلية”…بوحدها “الزيدية” للي ماشي شيعة حتى للهيه، لأنها في جميع الأحول كاتعتارف بخلافة “الشيخين”، يعني أبو بكر وعمر بن الخطاب، وكاتقبل أن الخليفة أو الإمام يختاروه البشر، في حين أن “الإمامية” و”الإسماعيلية” كايكففرو “الشيخين ومعاهوم عثمان، وكايقولو بللي أن الله عز وجل هو للي اختار “الأئمة” يعني الخلفاء من قبل وهوما حفدة فاطمة الزهراء وعلي بن أبي طالب، والأمة ماعندها ماتختار، بل حرام عليها تختار للي يحكمها…

دابا آشنو الفرق بين الإمامية والإسماعيلية؟
الفرق بسيط بيناتهوم من وجهة نظري…الإمامية كايآمنو ب12 إمام ابتداء من علي، وكا يوقفو عند الإمام الثاني عشر، وللي هو حسب اعتقادهوم، المسمى “محمد بن الحسن العسكري” للي “اختفى” وغبر على الأنظار سنة 880 ميلادية في “مدينة سمراء”، و كايآمنو أنه “غادي يرجع في آخر الدنيا” باش “يملأ الدنيا عدلا بعد أن ملئت جورا” وذاك العجب للي كايشبه للتصور للي عند المسيحيين بالنسبة لعيسى عليه الصلاة والسلام…وراهوم باقين كايتسنناوه حتى لليوم في إيران لعل وعسى يبان ليهوم شي نهار، ويمكن أنهوم غادين يتسنناو بزاااف ديال ليام والسنوات والقرون…

أما الإسماعيلية، فهي ظهرات من بعد واحد الصداع على ورث “الإمامة”، وللي ظهر بين ولاد واحد الإمام سمييتو “جعفر الصادق”…هاذ خيينا كان عندو جوج ديال الولاد، إسماعيل وموسى للي معروف باسم “موسى الكاظم”…الإسماعيليون كايكًولو بللي “جعفر الصادق” وصى لولدو إسماعيل بالإمامة السابعة، وماشي لولدو “موسى الكاظم” للي كاتآمن بيه “الشيعة الإمامية”…ومن هنا خرجو أتباع إسماعيل وكوونو فرقة شيعية جديدة سمييتها “الإسماعيلية” أو “السبعية” يعني أتباع “الإمام السابع للي هو إسماعيل”…والإسماعيليون هوما للي غادين يأسسو “الدولة الفاطمية” في تونس سنة 910 ميلادية كيف ما سبق ليا كًلت…ولكن كيفاش تمكنو باش يأسسو هاذ الخلافة وهاذ السلطة في المغرب قبل ماينتاقلو لمصر؟؟؟

في القرن الثامن الميلادي، وفي وقت “الإمام الثامن ديالهوم” للي سمييتو “محمد المكتوم”، هاذ الناس ولاد “إسماعيل” للي هو الأخ ديال “موسى الكاظم” كيف ماسبقت قلت، دخلو للعمل “السري” عملا بمبدأ “التقية”، أي أنك “تعلن ما لا تضمر”، باش يتتاقيو شر العباسيين ويتاقيو القمع للي كان موجه ليهوم هوما بالخصوص، ويتمسكنو حتى يتمككنو…هاذ العمل السري هو نفسو للي استاغلوه العباسيين باش يطعنو في نسبهوم الشريف ويححيدو ليهوم “الشرعية العلوية”، بحيث كانوجدو “الخليفة القادر” جمع كًاع للي عندو من شرفاء وقضاة ومثقفين واستفتاهوم في هاذ القضية…فقاموا بتحرير “محضر رسمي” للي كايقول بللي هاذ الناس من أصل فارسي، وجددهوم هو “ميمون القداح الفارسي”، وماشي علي بن أبي طالب وأولادو…

هاذ الفترة ديال “العمل السري” للي مارساتو “الحركة الإسماعيلية” امتدات من الموت ديال “إسماعيل بن جعفر الصادق” حتى لظهور “عبيد الله المهدي” سنة 910 ميلادية، وكايسمميوها “فترة التستتر”…والحركة الإسماعيلية في هاذ السنة بالضبط كانت مهيكلة كالتالي:

– على رأس قمة الهرم، كانوجدو “الأئمة المستورون” وهو حفدة ديال إسماعيل بن جعفر الصادق…
– من بعد كانوجدو “الأئمة المستودعون”، أو “الحجج” (جمع ديال المفرد: حجة)…وهاذو هوما للي كايكونو في الواجهة، وكا يناضلو باسم “الإمام المستور”..وفي هاذ الصدد، ما فيها باس نذككر بللي الأدبيات الإسماعيلية كاتقول بللي “ميمون القداح” للي العباسيين بغاو يللصقوه ليهوم كالجد الأعلى ديالهوم، ماكان غير “الكاتب الخاص” ديال “الإمام جعفر الصادق” والحاجب ديالو…بعض الباحثين المعاصرين لينا، بحال المستشرق البريطاني “مامور” في كتابو “سجالات حول أصول الخلفاء الفاطميين”، كايقولو بللي هاذ “ميمون القداح” ماهو إلا “الاسم المستعار” ديال “الإمام محمد المكتوم”، الإمام الثامن، وللي كان كايمارس مهنة “طب العيون”، وكان كايدير “الدعاية الشيعية” هو بنفسو ولكن تحت “اسم مستعار” باش يتفادى شر بني العباس، ويستقطب أكثر عدد من الأتباع !

في نهاية القرن التاسع الميلادي، واحد السيد من “قرية السلمية” قرب مدينة “حمص” في سوريا، وسمييتو “أبو عبدالله بن أحمد بن زكرياء” الملقب “بالمعلم”، غادي يعقد اتصالات بشي أعيان مغاربة من قبيلة “كتامة” أثناء موسم الحج…وقنعهوم باش يمشي معاهوم للمغرب باش ينشر الدعوة ديالو لصالح “آل البيت”…وبالفعل، في سنة 893 ميلادية، غادي هاذ “أبو عبدالله” يدخل للمغرب، وغادي يبدا في نشر الدعوة ديالو بشتى الطرق والأساليب، بما فيها الشعوذة والسحر وحتى تاشوافت !!

ولابد مانشير هنا، أن “أبو عبدالله الشيعي” هاذا، ماعلنش من اللول على نشر “المعتقد الشيعي”، لا…لأن السيد كان عارف بأن المغاربة فذاك الوقت كانو في غالبيتهوم يا إما معتانقين للمذاهب الخارجية، أو معتانقين للمذهب المالكي السني…ولكن من بعد ما احكم القبضة ديالو على الثلثين من تونس الحالية، عررا على وجهو، واعلن على أنه “شيعي إسماعيلي”…هاذ الإعلان، غادي يدفع الأمراء “الأغالبة” ديال تونس وللي كانو موالين للخلافة العباسية، أنهوم يوججهو ضدو جيش كامل من أجل محاربتو…ولكن هاذ الجيش ما صمدش أمام مقاومة وشراسة قبائل “كتامة” وأولاد عممهوم من قبائل “صنهاجة”، واستاطعو يهزمو الجيش الأغالبي، ولكن “الإمارة الأغالبية” بقات واقفة على رجليها على كل حال…كانت هاذ الهزيمة ديال الأغالبة سنة 909 ميلادية، ومككنات “أبو عبدالله الشيعي” باش ينادي على “الإمام المستور” للي هو “عبيد الله المهدي”، وينصصبو في السلطة على القبائل الكتامية والحلفاء ديالها…

ولكن مللي وصل “الإمام عبيد الله” للمغرب، لقاو عليه أمراء “دولة بني مدرار” السجلماسية القبض، ووضعوه تحت “الإقامة الإجبارية” لأنهوم كانو باقين كايحكمو باسم الخلفاء العباسيين ديال المشرق…هاذ الحدث هو للي غادي يدفع “أبو عبدالله الشيعي” بمساعدة قبائل “كتامة” باش يهجمو على “دولة بني مدرار”، ويخللصو “الإمام عبيد الله”، ويدخلو لمدينة “القيروان” معلنين نهاية “إمارة الأغالبة”، وقيام “الخلافة الفاطمية” في المغرب، ودارو من “عبيد الله” خليفة وأمير للمؤمنين، بحيث أن البنية الإدارية والموظفين كاملين ديال الأغالبة المهزومين دازو للدولة “الفاطمية الجديدة”، مع المحافظة على الحلفاء الكتاميين كجينرالات في الجيش “الفاطمي” الجديد، وبدات الخطب ديال المساجد كاتتقام باسم “الخليفة الفاطمي”، وذلك سنة 910 ميلادية كما سبقت الإشارة إلى ذلك…

ولكن ماجات تجي سنة 911 ميلادية، حتى شلا قبايل بدات كاتعارض “الخليفة الشيعي المعين”، لأنه ما بانت ليهوم حتى حاجة تغييرات ! ماكاين لا علامات “مهدي منتظر”، لا “مهدي معصوم”، لا “معجزات”، لا “كرامات” لا مولاي ببويه، السيد كايتصرف كأي حاكم آخر، كايجمع الفلوس وكايخسرها على الجيش والإدارة ديالو باش يجمعو ليه الفلوس، ونبينا عليه الصلاة والسلام !وباش يكمملها ويجمملها، “الإمام المنتظر” قام بإعدام “ولي نعمته” للي دار فيه الخير، “أبو عبدالله الشيعي” هو خوه “أبو العباس” على خلفية اتهامهوم بالمؤامرة وبالانقلاب !!

هاذ الحدث كان سبب رئيسي في اندلاع ثورات وانتفاضات متعددة في “طرابلس” وفي “صقلية”، وللي قمعهوم “الخليفة الفاطمي” بسهولة، الشيء للي جعل القبائل الكتامية تبقى وفية ليه…

وبين 914 و921 ميلادية، غادي ينظظم “الإمام المهدي” ثلاثة ديال الهجمات عسكرية ضد مصر في الشرق وحكامها التابعين لخلافة العباسيين في بغداد…وبالرغم أن النتيجة ديال هاذ الحملات كانت خاوية، استاطع “خليفة القيروان” أنه يبان بمظهر المعارض الوحيد لخلافة بني العباس السنية…

غير لابد ما نشير في هاذ الصدد، أن الانتفاضة الأكثر خطورة للي واجهاتها “خلافة الفاطميين” هي الثورة للي قام بيها “أبو يزيد مخلد بن قيداد” في الجزائر، وللي كان كايمثل المذهب الخارجي الإباضي الموروث عن دولة “بني رستم”…وهاذ المذهب هو للي معروف بمذهب “النكار”، أي الخوارج المغاربة للي رفضو مبدأ “توريث العرش والسلطة” للأبناء، عوض مسطرة الاختيار ديال الشعب…وهاذ “أبو يزيد مخلد” بقا وعاش ثائرا على “الخليفة الفاطمي الشيعي” وعلى الإديولوجية الشيعية بفضل المساعدات العسكرية والمادية للي كانو حكام الأندلس السني كا يمددوه بيها حتى لسنة 947 ميلادية للي كانت النهاية ديالو، وكانت سنة الإعدام ديالو من طرف “خليفة القيروان” الشيعي !!

هاذ الانتصار ديال الشيعة على المعتنقين للمذهب الإباضي، غادي يفتح الشهية الإديولوجية ديال “الخلافة الفاطمية”، وللي غادي تنهج سياسة محكمة في نشر المذهب الإسماعيلي في إفريقيا الشمالية…بحيث منعات على الفقهاء تطبيق مبادئ الفقه المالكي، وبززات على أئمة المساجد أنهوم “يلعنو” في المساجد وأثناء الخطب “الخلفاء الراشدين” باسثناء علي بن أبي طالب…بل أكثر من هاذ الشي، هو مللي “الخليفة الفاطمي” بدا كايعمل بنظرية “الحق الإلاهي” في ممارستو للسلطة العليا حصريا على سلالة علي بن أبي طالب…ويمكن يكون هاذا هو المسوغ للي دفع “عبد الرحمان الثالث” حاكم قرطبة في الأندلس أنو يعلن على قيام “الخلافة الأموية السنية المالكية” في شبه الجزيرة الإيبيرية باش يعاكس المد الشيعي للي بدا كايتغلغل في المجتمع المغاربي !!

1

موضوعات أخرى

28/03/2024 22:19

لشكر شتت تنسيق المعارضة.. زرب على بنعبد الله وبنكيران وأوزين وعلن رسميا باسم المعارضة على ملتمس الرقابة

28/03/2024 22:00

الأمير هشام العلوي عطا محاضرة فمعهد الدراسات السياسية فباريس على دور السياسة فالتقدم الاقتصادي فمنطقة الشرق الأوسط و دار مقارنة بين الانظمة ديال الخليج و ديال شمال افريقيا

28/03/2024 21:30

ضوسي السمسرة القضائية.. غرفة الجنايات بكومناف حكمات على عصابة ريبكو ليفها قضاة ومحامين وسماسرة بالحبس والغرامة

28/03/2024 21:00

يكذب الإسلامي وهو يتحدث عن تفكك الأسرة في الغرب! نحن روحانيون وأسرنا متماسكة وأطفالنا يكبرون في الشارع بعناية إلهية

28/03/2024 20:30

لاگوارديا سيپيل شدو جهادي صبليوني من أصل مغربي نشر رسائل مشفرة لدعم داعش وشروحات حول كيفية تصنيع المتفجرات

28/03/2024 19:50

الهاكا عطات دروس لـ”مومو” وهيت راديو: خاص احترام نزاهة البرامج وتكون مضامين اعلامية آمنة ويقظة و”المبادئ والقوانين” ماشي ترف

28/03/2024 19:30

جبن وزير النقل. سولوه على التطبيقات قال ليهم خاص موافقة الطاكسيات الكبار والصغار واخا شي وحدين مشوهين البلاد – فيديو

28/03/2024 19:00

الإعلام الجزائري خرج خبار فايك على نشر المغرب تصويرة للتراث الجزائي.. ومصدر لـ”كود”: كيف عارف كولشي السلهام مغربي