كود الرباط//
قيادة حزب الاستقلال مشات للجهة الشرقية دير التعبئة والاستقطابات استعدادا للانتخابات المقبلة لكن فشي محطات مداروش الاجراءات الاحترازية، وبين انه حزب غير منظم، عكس البي جي دي والاحرار اللي بانو اكثر تنظيمًا وحرصا على تطبيق الاجراءات الاحترازية.
الصور اللي توصلت بها “كود” كاتبين ان حزب الاستقلال ضربات الاجراءات الاحترازية رغم البلاغ الاخير لوزارة الصحة اللي كاتحذر فيه من خطورة التساهل في ارتداء الكمامات واحترام التباعد الجسدي، هادشي مداروش حزب الاستقلال، حيث همو هو الصوت الانتخابي ماشي الصحة ديال هاد الناس اللي جابو يحضرو للمهرجانات.
الصور من لقاءات مختلفة بالجهة الشرقية.
الغريب في الامر ان هادشي اللي دار الاستقلال امام اعين نزار بركة الامين العام الحالي، اللي معروف عليه ان صوت العقل والحكمة فهاد الحزب، لكن بهاد السلوك بان بأنه ميقدرش يضبط حزبو.
فهاد الايام الاخيرة شفنا تنافس كبير بين الاحزاب فالمدن، كل حزب كيقدم برنامجو الانتخابي وكيصيفط الرسائل السياسية، لكم الملاحظ هو ان جوج احزاب بانت منظمة ومحترمة الاجراءات الاحترازية هوما الاحرار والبي جي دي، اللي بانو اكثر الاحزاب منافسة على المرتبة الاولى.
