كود – وكالات //

مرا كبيرة، عندها كثر من 80 عام تسرقو ليها جوج خواتم ديال الزواج، واحد ذهبي ولاخور من الدياموند، وهي كاتموت فالصبيطار.

وهذ الحادثة وقعات فمدينة “إسكس” شرق بريطانيا، شي شهر دابا، بحيث كانت لاحظات عائلة المرا، اللي توفات من بعد فالصبيطار، أن خواتمها مشفورين.

وكانت هاد السيدة دخلات  لصبيطار برومفيلد فـ “إسكس” نهار 6 يونيو اللي فات، وماتت بعد 9 أيام.

وقالت الشرطة البريطانية أن الخواتم ماتحيدوش من يديها وهي كاتعالج، ولكن ماقدروش يلقاوهم ولا يعرفو فين مشاو.

وزادت أن الخواتم بجوج كانو مهمين عند السيدة، وكيدلو على أوقات وذكريات زوينة فحياتها.