حاورته: عفراء علوي محمدي- كود كازا//

جا الحاخام المغربي اليهودي، شلومو ميارا، للمغرب، فنفس الفترة اللي كتحيي فيها إسرائيل ذكرى المحرقة الأليمة، بالنسبة ليه فهذ الوقيتة هي اللي كيجي فيها ديما، من جهة حيت المغرب بلادو كيف قال، ومن جهة خرى عرفانا للجميل اللي دار محمد الخامس فاليهود، من بعد ما رفض تسليمهم للنازية من خلال جماعة “فيشي” من اجل إبادتهم.

وحجة وزيارة كيف كيقولو، الحاخام ماجاش بيديه خاويين، جاب معاه جوج كتب يالاه صدرهم، بعنوان “الصالح بين أمم العالم”، واحد كيتكلم على جهود الملك محمد الخامس فحماية اليهود، والثاني على الملك محمد السادس، وكيفاش حما اليهود واعترف بالمحرقة قبل من كَاع الرؤساء العرب، ودافع عليهم، وهوما الكتب اللي وقعوهوم حاخامات كبار فإسرائيل، وأكدو كَاع الحقائق التاريخية اللي جات فيهم.

شلومو ميارا، بدارجتو المطلوقة، تكلم ل”كود” فحوار مصور على هذشي، وعلى ابرز مضامين الكتب ديالو بجوج: “الملك محمد الخامس لجؤولو اليهود وعتقهم من الموت، فالوقت اللي توفاو بالزاف داليهود فتونس والجزائر وليبيا، لكن فالمغرب كانو محميين، من بعد ما رفض محمد الخامس تسليمهم، وقال أنهم مغاربة، وأنهم إلى بغاو يديرو ليهم شي حاجة يديرو ليه هو اللول”.

بالنسبة للكتاب الثاني، حول الملك محمد السادس، ففيه نماذج كثيرة ديال الرسائل اللي رسل للأمم المتحدة واليونيسكو دفاعا على اليهود، وكيفاش اعترف بواقعة المحرقة، ودعم ابناء الضحايا، وهذشي بشهادة الناجين اللي جابها شلومو فكتابو، بالإضافة لتوقيعات بزاف دالحخامات والمسؤولين واليهود فإسرائيل والعالم.

“كاين اللي عطيتو الكتوب وبكا مللي قرا الحقائق اللي فيها، واللي ماجبتهاش من راسي، كلشي مسجل بالوثائق ولوراق”، على حد تعبيرو.

وفالثلاثاء اللي فات، تلاقا شلومو بصديقو أندري أزولاي، واكدليه الرغبة ديالو فتقديم الكتب للملك محمد السادس، كيف سبق قدم كتاب ديالو بعنوان “ملوك الفضيلة والرحمة” حول الملوك الثلاثة، محمد الخامس والحسن الثاني ومحمد السادس، واللي فيهم فضل هذ الملوك المغاربة على اليهود، وهو الكتاب اللي قال ميارا انه عجب الملك بزاف.

وغير الجمعة اللي فاتت، حط ميارا الكتوبة الجداد فالديوان الملكي، وطبق البروتوكول، فانتظار يوصل الوقت ويتلاقى من الملك كيف كيتمنى من قلبو، كيف قال ل”كود”.