كريم الصوفي – كود//
[email protected]

نشرات عدد من الجورنالات الاسبانية تقارير عن منطقة  “فيلا ناركو” أو “المخبأ الفاخر” ديال بارونات المخدرات المغاربة ف إسبانيا. هاذ المنطقة كلها عامرة فيلات تبنات بدون تصريح او ترخيص من السلطات المختصة ف منطقة محمية ف لالينيا دي لاكونثيبسون بمقاطعة قادس.

بوليس الصبليون قدرو يتجسسو على المنطقة بدرونات وقالت مصادر في الشرطة، أن المنطقة تطورات عمرانيا ف ظرف 4 سنين ودابا كاين ساكن كثر من 100 شخص وكلهم ماشي ريڭلو والشوارع ضيقة ومغبرة وعندها وقريبة ل شاطئ أتونارا اللي كيتم فيه تفريغ الحشيش

وأشارت التقارير، أن المنطقة غير موصولة بشبكة الكهرباء والمياه وتم بناء الفيلات فيها بدون تصريحات إدارية والريزو ديال شركات الاتصالات ما كيخدمش بسبب التشويش على التردد وكاينة مراقبة متطورة بالكاميرات الأمنية ف المداخل والمخارج وأغلبية الفيلات ف سمية أشخاص دخلهم محدود أو بدون مأوى. وسبق للبوليس ف مداهمات سابقة العثور على سلع غالية من ماركات عالمية ومبالغ مالية كبيرة مخبأة ف الكوزينات ولاكورات وتحت الجاكوزي..

وقال ضابط شرطة، أن الجهات القضائية كتحاول مقاضاة هاذ البارونات بتهم غسل الأموال، لكن بمجرد معرفة المالك الأصلي، كتبان شركات جديدة تدعي شراء العقارات والأراضي وتحقيقات البوليس كترجع للزيرو، كما حاولات مجلس البلدية مقاضاتهم بسباب البناء بدون ترخيص ومخالفات التعمير، لكن القضية ثقيلة وف الغالب غادي تسالي ب عقوبات إدارية خفيفة ومن الصعب هدم الفيلات..