عفراء علوي محمدي- كود//

اتهم اتحاد العمل النسائي وزارة التضامن والتنمية الاجتماعية والمساواة والأسرة بكونها مادعماتش الجمعيات باش تساعد العيالات المعنفات فحالة الطوارئ الصحية، خصوصا وأن عدد النساء المعنفات ارتفع فهذ الفترة بشكل كبير.

كيقول الاتحاد، فبيان ليه توصلات بيه “كود”، بللي الوزارة ماعطاتش توضيحات على الاستراتيجية ديالها، وما دعماتش المجتمع المدني باش يقوم بدورو على أكمل وجه ويساعد المعنفات، ومراكز النجدة كيشتغلو بالتطوع وكيأدو مصاريف المكالمات والتنقلات من جيوبهم.

وكشف الاتحاد بللي ف1 أبريل اللي فات اتصلات وزارة التضامن بالاتحاد لإعداد مشروع صغير لثلاثة أشهر لتغطية مصاريف منصة النساء ضحايا العنف خلال فترة الطوارئ الصحية، “أنجزنا المشروع ورسلناه في اليوم الموالي وماتلقينا حتى جواب، من بعد الوزارة قالت فتصريحات للصحافة أنها دعمات الجمعيات وشبكات ومراكز الاستماع لمساعدة ضحايا العنف، وحنا ماشفنا والو من هذشي”، كما جاء فالبيان.

وحاولات “كود” تتصل مرات كثيرة بوزيرة التضامن، جميلة المصلي، باش تاخد رأيها فالموضوع، لكن تيليفونها صوها بدون جواب.