كود كازا ///
البارح كانت اول رحلة بين كازا ومطار مالگا فالجنوب الاسباني. حصلو مغاربة كثار فيهم ملايرية وناس معروفين. اللي كان غريب فاول رحلة اللي وصلات لكازا مع الوحدة ونص تقريبا هو جمال شقرون راجل مريم بنصالح. السيد خلى طيران “العربية” اللي كتملكو عائلة مراتو وغادي يكون عندو شي حصيصة فيه واللي كيدير رحلة من مالگا لطنجة وجا مع لارام.
يعني مالين ها الخطوط ديال الامارات ومدخلين فكل دولة عربية اسهم لرجال اعمال ديال ديك لبلاد٬ ما كتعجبهمش هاد الخطوط.
هو ديك العربية ما فيها ما يتعجب. ما عرفناش شكون اللي فالدولة كيدعمها حتى دخلوها مع “لارام” باش تروج الحركة شوية بعد 4 اشهر ديال التوقف والخسائر لكبيرة.
هاد جمال كان فلندن وباش تسدو الحدود نزل لمدريد ومنها هبط لدار ديالهم فماربيا وبقى كثر من 4 اشهر. كان دار محاولة باش يدخل فطيارة خاصة٬ الساعة المخزن گاليه كون تحشم ماشي بفلوسك نديرو ليك معاملة حسن من باقي لمغاربة اللي حصلو. كان التوزيع العادل للتكرفيص بين لمغاربة اللي حصلو٬ غير هو تكرفص بعيد على عوالمو ماشي مشى عند القنصلية كيطلب منها تعطيه الگفة بل هو كان يدير مبادرة ويتكلف فعائلات حاصلين من الملاير اللي عندو.
المهم السيد دخل البارح مبرونزي وفرحان ل”لارام”