كريم الشركي – كود //

المغربي لي تقتل نهار الاحد فمنطقة “بينا ابيس” قرب مالكَا الاسبانية، قالت وسائل اعلام اسبانية، أنه كان داخل سيارة بنتلي فاخرة وعندها ترقيم مغربي، وبين تشريح الجثة أن السيد جاو فيه بزاف دالقرطاسات فالراس من سلاحين مختلفين.

وقالت ذات المصادر، ان طريقة قتل الهالك بحال القتل بطريقة المافيا، جاو على الاقل جوج ديال الناس ووقفوا حد الطوموبيلة لّي كانت يالاه وقفات حدا “كابانوس دي كَولف” الفاخر، وغير وقفت جاو وبداو كيتيرو فيه القرطاس من مسدس وسلاح رشاش.

وزادت نفس المصادر، ان القتل متعلق بحسابات بين المافيا، وأنه فالشهر لي فات وقعات محاولة تصفية مغربي اخر بعدما ضربوه بالقرطاس وجاه فظهرو ولكن فلت من الموت.

واشارت وسائل الاعلام الى أن الهالك كانت فيه كورونا حسب ما بين تحليل “بي سي ار PCR” لّي كيديروه حتى للجثث.