كود – وكالات//

حكم القضاء البريطاني بالحبس 5 سنين و3 شهور على راجل قتل 9 ديال المشاش فشهورا قلال فمدينة برايتون (جنوب شرق بريطانيا) وروع الجيران ومالين القطوط وسكان المدينة.

الشخص اللي سميتو “ستيف بوكي”، وهو بوليسي، عندو 54 عام، تحاكم بتهمة قتل 9 ديال المشاش و تكرفس على 7 آخرين بين أكتوبر 2018 ويوليوز 2019، وعاد تهمة حيازة السلاح الأبيض، الشي اللي كايتعارض مع القانون، و واخا هكاك، بقا المتهم متمسك ببراءتو ونكر كلشي.

ونفى “بوكي” علاقتو بعمليات القتل، اللي قال أنو سمعها غير فالأخبار، ولكن على عكس كلامو لقاو فـ تيليفونو صورة ديال مش مقتول.

وفمحكمة “هوف كراون” بالقرب من برايتون، فين تحاكم “بوكي”، كشفو موالين الحيوانات المقتولة معاناتهم فاش لقاو قطوطهم مقتولين وكلهم دمايات حدا بيبان الديور.

ومن غير هادشي، نشرات قناة “سكاي نيوز” فيديو للمجرم “بوكي” وهو تابع مشة، وهاز الموس فيديه.

ومازال ماتعرفش علاش كان كايدير “ستيف بوكي” هاد الفعايل الوحشية كلها.