23/04/2024 09:30
ورقة صاوبها گوتيريش حول نزاع الصحراء للجنة الرابعة: الحالة السائدة تسببات فصعوبات كبيرة لمينورسو بحال اللوجستيات وإعادة التموين . الجزء 1
كود مدريد ///
نايضة فمدريد بسباب پيگاسوس. البرنامج الاسرائيلي للتجسس. فقد كشفت الحكومة الاسبانية اليوم فندوة نقلتها قنوات واذاعات وصحف صبليونية ان تلفون رئيس الحكومة بيدرو سانشيث وتلفون وزيرة دفاعو مارگاريتا روبليس تعرضو للاختراق وتجسسو عليهم عبر برنامج “پيگاسوس” الاسرائيلي.
الحكومة ما قالتش الجهة اللي دارتها. اكتفت فتصريحات قصيرة بالحديث على “جهات اجنبية” وان هاد الشي دار جوج مرات فماي من العام اللي فات وبعد شهر اي يونيو 2021 كانت محاولة اختراق وزيرة الدفاع.
دابا تقرر باش جميع تلفونات الوزرا فالحكومة الحالية سواء اللي مازال فمنصبهم او اللي تم تغييرهم٬ يتفتشو واش تم اختراق تلفوناتهم ولا اللا.
واعلن وزير الرئاسة فيليكس بولانيوس فندوة صحافية هاد الصباح باللي القضية بيد القضاء.
هاد الشي جا بعد ما تم الاعلان عن حالات تجسس بنفس البرنامج على شخصيات كاطالونية مطالبة بالاستقلال. هادوك كانو اتهمو الحكومة المركزية بهاد الفعلة
زعيمة فاليسار الراديكالي “پوديموس” المساند للحكومة٬ يوني بيلارا٬ قالت باللي هاد اللشي اللي وقع كيحمل مسؤوليتو اجهزة الامن فالبلاد وباللي هاد الشي كيضر بالديموقراطية
