عفراء علوي محمدي- كود//

المغاربة فين ما مشاو كيحمرو وجه المغرب فمختلف المجالات، وحتى التلاميذ المغاربة اللي كيقراو البكالوريا فالخارج جابو أحسن النقاط ونجحو بتفوق كبير.

مواقع التواصل الاجتماعي عمرات بصور جوج أبطال شدو الباك بميزة مزيانة فالخارج، وب”النقطة الكاملة”، النشطاء حياو التلميذين بجوج، واعتبروهم من النوابغ اللي كيستحقو التكريم، لرفعهم بالراية المغربية برا، وكيتعلق الأمر بالمغربية القاطنة بفرنسا، إلهام الخلوقي، والتلميذ المغربي يحيى خلفي، اللي كيسكن فالطاليان.

بالنسبة لإلهام الخلوقي، فشدات الباك ديالها فالثانوية الأوروبية فمدينة فيلير كوتري شمال فرنسا، وجابت 20/20، وحظات باهتمام كبير من طرف الإعلام والتلفزة الفرنسية.

وهذ العام فرنسا لغات امتحانات البكالوريا، واكتفت فقط بنقط المراقبة المستمرة، اللي جابت فيها الخلوقي نقطة 20 فجميع المواد.

أما بخصوص التلميذ يحيى خلفي، فتمكن من الحصول على نقطة 100/100 فمسلك العلوم التجريبية، من ثانوية بمدينة كريمونا الإطالية، وكيتعتبر هو اول أجنبي كيشد الباك بهذ الميزة فالعلوم التجريبية.

وبدورو، اكتسحات صور خلفي الإعلام الإيطالي، اللي اعتبر أنه حطم الرقم القياسي بحصولو على الباك بهذ النقطة، اللي ماكانش ساهل الحصول عليها فإيطاليا، بعدما انتشر فيها بشكل كبير فيروس كورونا المستجد.