كود علي الصافي العيون ///
كاينين شي وحدات ووحدين كيشمشمو غير على فين كاينة الماكلة. هاد القضية ديال الكركرات كلشي دارها وبالسكات. ما فيها باس داخلة فرفع المورال الجمعي للمغاربة. غير هاد ليام ليلى اوعشي اللي كانت فدوزيم وولات مع جطو ودارت شي وكالة ما نجحاتش وقلباتها استثمارات فالداخلة حتى ولات ملايرية مع شي حد اخر اسمو السنوسي٬ دايرة سباق للطونوبيلات لقدام.
هاداك فيلم بوحدو خاصو تحقيقات صحافية. اش هي الطونوبيلات لقدام وكيفاش كياخدو هاد “لابيل” واش كيدير هاد الجمعية؟ ما غادينش يضحكو علينا بنشاط مايع تافه لناس ديما مسبقين مصالحهم وبيزنس ديالهم على اي حاجة اخرى.
المهم هاد ليلى اوعشي مدخلة نيفها فهاد الشي كيف كدير ديما مع شي احداث عندها علاقة بالداخلة، هاد النشاط التافه رابحة منو حقاش نازلين عندها فاوطيل ديالها. اييه ناس الداخلة المعروفين بالتجارة عبر التاريخ ما دايرينش هاد الاستثمارات ووحدة طاح بيها الصفق فالمنطقة ولات ملايرية. كاع السلطات تماك كتخاف منها وما عمرنا عرفنا علاش. واش ايلى جا شي مرة ولي العهد او اميرة خاص بنادم يستغل الحدث باش يخلع بيه هاد الشي؟
المشكلة هي رابحة مع شريكها فالبيزنس وجهة الداخلة وادي لذهب داعمة هاد الشي. ومعاها حتى الخطوط الملكية المغربية. كيفاش يمكن لمؤسستين ديال الدولة يدعمو نشاط بهاد التفاهة. كيفاش كلشي باغي يوظف الصحرا باش يبان. كيفاش كيدارو انشطة كلشي فيها الا اولاد المنطقة. هاد الشي كيضر القضية ماشي كيعاونها.
