كود علي الصافي ///

غريب تصرف مثير بزاف فتعيينات بوريطة ل19 سفير. من غير امور كثيرة شارت ليها “كود” فمقالات فالسابق كاينة نقطة اللي فيها الغرابة. ما كاين حتى شي سفير من الصحرا فالجنوب المغربي. هاد السياسة الخارجية عندنا مبنية على قضية مركزية هي “الدفاع عن مغربية الصحرا” ولكن اللي اختارو يرجعو من تندوف ولا اللي بقاو فمدن الداخلة والعيون وسمارة وبوجدور… ما كاين منهم والى واحد. 

هاد العام اللي فات وحتى بداية هاد العام كان افتتاح لقنصليات دول افريقية فالداخلة وفالعيون. الفكرة بدات مزيانة ولكن من بعد كثار هاد الشي وهو يبسال. دابا بوريطة ديما هاز مقصو ويفتاتح. كيمشي عند دوك الناس ولكن باش جات التعيينات قلب عليهم.

“كود” من خلال اهتمامها بموضوع الصحرا ومن خلال تواجد مكتبها فعاصمة الصحرا بالجنوب المغربي ومن خلال وجود صحافيين من اولاد التراب٬ عارفة ان اكثر واحد ضابط هاد الملف فالصحرا هما صحراوا هما ولاد المنطقة. عندهم كفاءات كبيرة بزاف. ممكن يتم تعيينهم فشي دولة ناطقة بالاسبانية او حتى دول شمال اوربا باش يواجهو بالفعل المد الانفصالي. يواجهوه حقاش مسلحين بنفس سلاح الانفصاليين. 

فمقال سابق هدرنا ف”كود” على عينة من هاد الكفاءات. كلثوم الخياط ولا گجمولة بنت ابي وكاين نساء من المنطقة قويات وذكيات وسياسيات محنكات. اما ملف الصحرا فراهم عايشينو. كاين اسماء اخرى تستحق تكون فاللائحة بحال رقية الدرهم بحال البشير الدخيل ولا احمد الداهي ولا احمد موسى القنصل اللي داير خدمة ما يقدرش عليها حتى سفير… كاينة لائحة كبيرة ديال اطر عالية المستوى جات للمغرب وبقات بلا مهمات. من كاع لقبايل.

المغرب ما يمكنش يربح معركة الصحرا بتهميش صحاب القضية من الوحدويين. رسالة المغرب اللي كيفهموها ناس الصحرا لللاسف وهي ان المغرب باغي الصحرا بلا ناسها ولا كان قابلهم فغير باش يلبسو الملحفة والدراعة ويجيو يتصورو ولكن ايلى كان شي دفاع فشي محفل بحال السفرا مثلا فما كتكونش الثقة فهاد الفئة.

راه خطأ كبير بزاف فالوقت اللي البوليساريو كتعاني وعندها مشاكل داخلية كثيرة وخرج موضوع انتهاكاتها الجسيمة لحقوق الانسان من العام اللي فات حتى اليوم وتجي الرباط وتهمش هاد الناس.