كود بروكسيل//

اليوم غادي يتناقش مشروع ادانة المغرب في البرلمان الاوروبي اللي قدموه مجموعات برلمانية ديال الخضر و الاشتراكيين الدمقراطيين و حزب الشعب الاوروبي، و اللي بغا يستند على اتفاقية حقوق الطفل باش يقول ان الدولة المغربية خرقاتها ملي- حسب زعمهم- سهل اجتيازهم لحدود سبتة المحتلة.

هاد مشروع الادانة تزادت عليه مجموعة برلمانية اخرى وهي ID وكتعني هوية و ديمقراطية و هو تجمع لاحزاب اليمين المتطرف الاوروبي القومي و اللي فيه  التجمع الوطني الفرنسي و البديل من اجل المانيا و الفلامس بيلانك الفلاماني البلجيكي و ليغا و غيرهم.. و هما وافقوا مبدئيا يدعمو و يصوتو على مشروع الادانة ولكن بشرط اضافة بعض الفقرات ومن بينها فقرة مهمة بزاف  تترجمها كَود كما يلي:

• “يدين البرلمان الأوروبي الأنشطة الغامضة لما يسمى جبهة البوليساريو في الأشهر الماضية، من بينها الدخول غير الشرعي لزعيمها ابراهيم غالي لمنطقة شينغن باستعمال هوية غير حقيقية و وثائق مزورة الأمر الذي أشعل التوتر الديبوماسي بين المغرب و اسبانيا .
•  يدعو لحل سريع لنزاع الصحراء الغربية من أجل تجنب زعزعة استقرار شمال افريقيا علما ان 43 دولة تدعم الموقف المغربي في هذا الشأن.”

وحسب مراقبين صرحوا لكَود فإن مثل هذه الفقرة طبيعية جدا نظرا للعداوة اللي بين الأحزاب القومية الاوروبية و الايديولوجية اللي كتبناها البوليساريو ديال الماركسية و أجواء الحرب الباردة.. ومن جهة أخرى قال  نفس المراقبين المختصين في الشؤون الاوروبية أن هذا التعديل كاين احتمال ضئيل أنه يمر بسبب معارضة الاغلبية  في البرلمان الاوروبي ليه اللي كتشوف انها خص تبقا محايدة في قضية الصحراء المغربية و تبقا ف الجملة الشهيرة ديال : “احترام قرارات الامم المتحدة و البحث عن حل سلمي متوافق عليه”.