كود كازا ///

ومناظرة تاريخية دارت البارح بين المرشحين للرئاسيات الامريكية: رونالد ترامب وجو بايدن. هاد المناظرة هي الاولى من اصل 3 والماتش بيناتهم كان فيه ساعة ونص وتلعب فكليفاند فاوهايو. فالبدية هجم ترامب على بايدن وبغى يبينو ضعيف باش قال ليه “غاديين يتحكمو فيه يا جو =الاشتراكيين= وانت راك عارف هاد الشي”. المرشح الديموقراطي رد “انا الحزب الديموقراطي دابا”.

بايدن من بعد جبد ليه الاسلحة الثقيلة وما خلى فيه والو. بايدن تقلق باش حبسو اكثر من مرة ترامب وهو يقول ليه ” وا نبادم، ما تقدرش تسد فمك”. المرشح الديموقراطي وصف ترامب بالكذاب وبالكلون “اللي كتقولو كلشي كذوب. راني هنا ماشي باش نعلن على كذوبك. كلشي عارفك كذاب”. ترامب رد عليه “جو انت اللي كذاب”.

طبعا مع مرور الدقائق بقى بايدن كيضرب. قال عليه كيبنح وباللي خرج على امريكا وعاود سماه “مهرج”.

هدرو على 6 مواضيع فيها طريقة تعامل ادارة ترامب مع الجايحة كورونا فيروس.

استطلاعات الرأي هدرات على تقدم بايدن على ترامب بعد هاد المواجهة. طبعا هاد الشي ما عندو قيمة. فالانتخابات اللي وصلات ترامب للبيت الابيض٬ كانت المنافسة ديالو الديموقراطية كلينتون هيلاري٬ سبقاتو فكاع استطلاعات الراي اللي دارت بعد المواجهات التلفزيونية 3 .

المعركة الجاية غادية تكون ف15 اكتوبر بميامي بفلوريدا والثالثة ف22 اكتوبر فناشفيل بتينيسي وكاينة مواجهة بين نائبي المرشحين ف7 اكتوبر بسولت ليك سيتي فولاية يوتا.