عفراء علوي محمدي- كود//

ترأس عزيز أخنوش، وزير الفلاحة والصيد البحري والتنمية القروية والمياه والغابات، يوم الخميس، عن طريق تقنية الفيديو، اجتماع اللجنة الاستراتيجية للوزارة، مع المسؤولين المركزيين والمديرين الجهويين والمؤسسات العمومية، باش يناقشو تحضيرات الموسم الفلاحي 2021/2020، بالإضافة لحالة تموين السوق الداخلية فالخريف، وتوقعات إنتاج الأشجار، وتوزيع الزراعات.

والتوقعات الأولية كشفات أن انتاج السلاسل المثمرة مزيان وخا كاين وضع مناخي صعب والمرحلة كتعرف انتشار فيروس كورونا المستجد، بحيث إنتاج الحوامض غيرتفع ب29 فالمية بالمقارنة مع الموسم اللي فات، وغيرتفع انتاج الزيتون ب14 فالمية، وغيتزاد انتاج الثمر ب4 فالمية، والتفاح ب14 فالمية، والرمان ب2 فالمية. وهذ الوفرة فالانتاج جات بسبب عوامل عديدة منها عوامل مناخية والنتائج الإيجابية اللي عرفها المخطط الأخضر وارتفاع الانتاج فالحقول الجديدة.

بالإضافة لهذشي، طلقات وزارة الفلاحة والصيد البحري والتنمية القروية والمياه والغابات برنامج توزيع الزراعات الخريفية الرئيسية، اللي غتوزع على مساحة 5,8 مليون هكتار، مع مراعاة الموارد المائية والتغيرات المناخية، وكيخص هذ البرنامج بدور الحبوب والقطاني والأعلاف والخضروات والزراعات السكرية، وهذ البرنامج غيضمن تزوبد السوق المحلي والاستجابة للزيادة في الطلب على صادرات الخضروات، وغيضمن التوازن بين العرض والطلب.

وغتخصص مساحة 105.000 هكتار للخضروات، والانتاج ديالها غيغطي من يناير لماي، وخصوصا بالنسبة لماطيشة، كيف غدي تستقر الأسعار فالسوق، والزيادة غتكون ظرفية، وماطيشة غينخفض الثمن ديالها مع بداية أكتوبر.