عفراء علوي محمدي- كود//

قرر مجلس جهة كازا سطات، بشراكة مع مجلس جماعة كازا وعمالة كازا، وبتعاون مع المديرية الجهوية للصحة تعزيز الطاقة الاستعابية للمستشفيات، إحداث صبيطار ميداني مجهز بجميع المعدات الطبية اللازمة، غيتم تخصيصو لمرضى فيروس كورةنا المستجد.

وقال مجلس جهة كازا سطات، فبلاغ مشترك ليه مع مجلس جماعة كازا وعمالة كازا، بللي أشغال تجهيز المستشفى بدات لبارح السبت 4 أبريل، وبللي هذ المستشفى غادي يتصايب فأسواق ومعارض كازا ف2 سيمانات باستثمار ديال 45 مليون درهم، وغايتجهز على مساحة 20 ألف متر ويحتضن 700 سرير، وهذشي بتمويل مشترك بين الهيئات المحلية الثلاث.

وغيتقسم الصبيرار ل4 ديال المرافق اللي غاتكون منعزلة على بعضها، وكذلك كل جهة غاذي يكون عندها طاقم طبي خاص بيها، كتشمل معدات ديال الضغط، وجهاز لمعالجة الهواء باش يتجدد الهاوا فالأروقة ديال الصبيطار.

والباركينكَ ديال المعرض غادي يتحول لساحة للاستشارة الطبية، وقاعة ديال الاستراحة ومكاتب للأطباء، بالإضافة إلى حمامات ومراحيض مخصصة للأطقم الطبية.

وتكلفات شركة التنمية المحلية الدار البيضاء للإسكان والتجهيز وشركة الدار البيضاء للتنشيط والتظاهرات باش يبنيو هذ السبيطار الميداني، بإشراف عامل مقاطعة أنفا، وبتنسيق مع المديرية الجهوية لوزارة الصحة.