كريم الشركي-كود///

قالت صحيفة ال باييس، ان رئيس الحكومة الاسبانية بيدرو سانشيث، غايتلاقى مع الرئيس الامريكي جو بايدن خلال اجتماع حلف الناتو السيمانة الجاية.

وقالت الصحيفة أن قصر مونكلوا الاسباني كان كيربط اتصالات فالايام الماضية مع البيت الابيض، باش يدير لقاء ومحادثة بين بايدن وسانشيث، ماشي غير لقاء تحية فقط.

هاد اللقاء حسب الصحيفة كيجي فوقت كتعاني فيه العلاقات الامريكية الاسبانية من الجفاء، بعدما تاصل الرئيس الامريكي بزعماء ثلاثين دولة، وماتاصلش برئيس حكومة اسبانيا.

طبعا اللقاء مازال ماباينش علاياش غايكون، ولكن غايهضر فيه سانشيث على زيارتو لأمريكا الجنوبية بالاضافة لانه اكيد غايهضر على الاعتراف الامريكي بالصحراء المغربية، وهادشي يلا دارو غايكون محاولة تأليب الرئيس الامريكي وممكن يجبد صداع كبير مع المغرب.

طبعا كاين بزاف دالنقط كلات فيهم اسبانيا لعصا، منها دعم امريكا للمغرب، والاعتراف بالصحرا، ومناورات الاسد الافريقي لي ماخلاش المغرب اسبانيا تشارك فيهم وامريكا وافقات حقاش اصلا ماراهاش مزيانة مع الصبليون.

https://elpais.com/espana/2021-06-10/joe-biden-y-pedro-sanchez-mantendran-una-entrevista-bilateral-en-la-cumbre-de-la-otan.html