كود اسماء غربي ////

وزيرنا محتقر النساء الذكيات القويات ناصر بوريطة بين على “خصلة” اخرى بانت فيه. الغباء. هاد الشي بان فبيانو اللي خرج بخصوص السماح للمغاربة والمقيمين بالمغرب يجيو للبلاد من 15 هاد الشهر. البيان الاول كان كولو طلاسيم. جات توضيحات من وزراء فالحكومة باش يقولو راه ماشي فتح حدود غير اجراءات استثنائية. جا بيان الحكومة بعد اجتماعها الاسبوعي نهار لخميس وزاد وضح. مع ذلك بقى بيان بوريطة اللي معروف فالخارجية انو كيكتبو بوحدو وما يشرك معاه حد وما كيثيق فحد فهاد الشي اللي عندو علاقة بالاضواء. 

تسنينا شوية باش يخرج عند الرمضاني فاذاعة “ميد راديو” وما شرح والو. معضلة تاريخية فالتواصل خاصها تقرى اللي دار هاد الساط اللي مفروض فيه الوضوح والدقة فبياناتو. راه وزير الخارجية والتعاون.

باش عافو باللي كاع الخرجات ما وضحات والو ناضت الخارجية دارت توضيحات اخرى وهو التوضيح الخامس. والو.

فين كاين المشكل؟ فاللول كان على شكون يدخل وعلى التيست “بي سي ار” واختبار سيرولوجي. تحل هاد المشكل ديال شكون يدخل واش فتح الحدود ولا اللا. فالبيانات والتوضيحات اللي جات من بعد هدرات على التحاليل اللي خاص المسافر اللي بغى يدخل المغرب تتوفر فيه. 
تحل المشكل جزئيا. كيفاش 5 ايام عاد دير بيان كتقول فيه باش عاقت ان دول بحال موريتانيا وغيرها وشي تحاليل ما كايناش حتى فامريكا٬ عاد تخرج الخارجية كتقول باللي “بالنسبة للبلدان، ولا سيما الإفريقية، حيث يتعذر إجراء  اختبارات الكشف (بي سي ار) أو الاختبار السيرولوجي (تحاليل مصلية)، ، فإن الاتصالات جارية مع سلطات هذه البلدان الصديقة لإيجاد حلول مناسبة في أقرب الآجال”. ها فضيحة. 

الخارجية قالت باللي اللي غادي يجي بالطونوبيل من “سيت” بفرناسا و”جينوى بايطاليا غادية ديرو ليهم تيست فالباطو. طبعا غاديين يخلصوه ولا يدخلوه فبيي الباطو. اصلا كيدوزو ايام فالطريق.

وجا فالبيان باللي الاطفال اللي عندهم قل من 11 عام معفيين من التيست “بي سي ار”.

فين بقات المشكلة. بقات مشكلة كبيرة الخارجية ما بغاتش تهدر عليها حقاش فيها وزير بحال بوريطة ماشي غير اقصاء مناطق مهمة وبسوء نية بل هاد التيست ديال “بي سي ار” اللي قالت الوزارة راه مقبول غير اللي عندو 48 ساعة. هادي مستحيلة. راه الوزير عندو سفارات وقنصليات يسولهم. علاش مستحيل؟ واخا دير كلشي وتخلص غالي راه ما كيخرج نتائجو الا بعد 48 ساعة فمختبرات اوربية. يعني مستحيل ديرو لاربعاء فالصباح وانت عندك طيارة الجمعة. حقاش هو غادي يخرج نفس النهار وما يمكنش تكون عندك رحلة مع لطناش وخاصك تكون فالمطار مع التسعود٬ تجيبو معاك. 

دابا خاصنا يمكن شي جوج بيانات اخراين باش توضح الصورة. مهزلة وزير ناقصو الذكاء كلفوه بملف كبر منو وشوه بلاد كلها