مصطفى الشاذلي – كود سبور//

المهدي بنعطية، عميد المنتخب الوطني والدحيل القطري، داير سيسبانس، فاش گال أنه غادي يعلن على خبر مهم هاد العشية فبرنامج على قناة بين أن سبورت الفرنسية.

بنعطية نشر مقطع فيديو عبر حسابه الرسمي على موقع التواصل الاجتماعي أنستغرام، كيطالب فيه المتتبعين ديالو باش يتابعوا الحوار ديالو كامل، لغادي يگول فيه خير جديد.
وظهر بنعطية بالفيديو هو وخوه وولدو الصغير.

ومن المنتظر أن يؤكد بنعطية الخبر، لي سبق ل”كود” أن كانت سباق ليه، ويتعلق بقرار إعتزاله الدولي، خصوصا أن عميد المنتخب الوطني رفض يلبي الدعوة للناخب الوطني وحيد خاليلوزيتش باش يشارك فالمباراتين الإعداديتين أمام ليبيا والگابون نهار 11 و15 أكتوبر الجاري.

بزاف ديال المتتبعين أكدوا بلي بنعطية ما عندوش مع مصطفى حجي المدرب المساعد، لهذا قرر تعليق مشاركته مع المنتخب الوطني، ووحدين أخرين رجعوا سبب ذلك أن عميد المنتخب تراجع مستواه وحس بأنه ما بقا عندو ما يعطي لأسود الأطلس.