كود احمد الطيب ////

رئيس الحكومة ديالنا بنعرفة كيعتاقد ان الشعب اخر همو. بعد خطاب العرش قال ليه رئيس الدولة جيب كفاءات فالحكومة والادارة. يعني بدل علي عدد من الوزراء. من غير ان هادي سابقة فتاريخ الحكومات مع محمد السادس وحتى مع بوه الحسن الثاني٬ فهاد الشي اهانة ليه. حقاش جاب وزراء ما فيدهمش.

بعد الخطاب كان خاصو يجري ويجاري يقاد امورو. غير فالدول اللي فيها الحد الادنى من الديموقراطية باش كيوقع بحال هاد الشي خاص رئيس الحكومة يتواصل مع الشعب. عندو وسائل تقليدية حكومية بحال القنوات والاذاعات الرسمية وكاين طرق اخرى للتواصل عبر الصحف والمواقع وكاين حسابو الشخصي فالفايس وتويتر اللي ممكن يخبر بيه الراي العام بمستجدات هاد التشكيل.

كيتلاقى مع زعماء احزاب الاغلبية وما كيسيق حد خبار. كيبدا معاهم فمناقشة الهيكلة الجديدة بلا ما يخبر الراي العام. فالاخير كيخرج هو وامثالو من السياسيين اللي كيحتاقرو الشعب كيقولو راه لمغاربة كيقاطعو الانتخابات ووو. بحالك كيخلي لمغاربة يقاطعو كلشي. ما عندهش مكانة عندك. ما كتحتارمهم. انت اصلا ما خديتيش رئاسة الحكومة بالكفاءة. كسيدة السياسة وصافي. حزبكم جا الاول بصوت لمغاربة. علاش تخليتي على هاد المغاربة.

راه الشفافية خاصها تكون فمسار تشكيل الحكومة. كاين اللي ممكن تتواصل بيه وكاين امور اللي خاص يحسم فيها رئيس الدولة ولكن علي الاقل يكون استحضار لمغاربة عندك. شوف سيدك بنكيران باش كان فمفاوضات تشكيل الحكومة كيفاش كان دايرها بشفافية. قدام دارو كاين اكثر من خمسين صحافي. عارفين اللي داخل واللي خارج.

علاش ما تعلمش منو وتتواصل. دير حوار مع التلفزيون على سير هاد المفاوضات. خرج فتويتر. ماشي تقول للمغاربة وانت كتطنز عليهم راه ولات صورة رسمية جديدة لمحمد السادس. راه محمد السادس قال ليك جيب لي الكفاءة ماشي التلحميس. جيب القافزين ماشي المنافقين اللي كيدرگو عليه الحقيقة.

غادي يذكرك التاريخ بانك وصلتي للحكومة ماشي على ذراعك. بانك كنتي ضحكة عند الشعب. بانك احتاقرتي هاد الشعب. نهار تجي انتخابات 2121 غاديين يجريو عليك. عقل عليها.