عمـر المزيـن – مكتب الرباط//
[email protected]

في ظل الارتفاع الصاروخي في أسعار المحروقات وتخوف الحكومة من الشروع في إجراء مسطرة تسقيف الأسعار. علمت “كود”، من مصادر مطلعة، أن رئيس الحكومة، سعد الدين العثماني، طلب قبل أيام قليلة من محمد بنشعبون، وزير الاقتصاد والمالية، بتزويده بجميع المعطيات المتعلقة بتخزين المحروقات.

من جهته، أقر لحسن الداودي، الوزير المنتدب لدى رئيس الحكومة المكلف بالشؤون العامة والحكامة، في تصريح لـ”كود”، بارتفاع أسعار المحروقات. وعزا ذلك إلى ارتفاع سعر البرميل دوليا، حيث تجاوز ثمنه 72 دولار.

وأكد الوزير الداودي: “الحكومة راه خدامة على هادشي، ودبا يلا قذر الله وطلعات الأسعار دوليا راه غادي تكون شي سيناريوهات أخرى، ورئيس الحكومة راه التقى بوزير المالية على هادشي. وخدامين باش ميجيش التسقيف بوحدو لا زلنا ننتظر”.

وبخصوص واش بصح الحكومة مغاديش تمشي للسقيف، خاصة أن رئيس الحكومة كان قال قبل أيام أن هادشي صعب يكون. أوضح الوزير الدوادوي، قائلاً: “وخا قال على أنه صعب ماشي باش ميديروش لكن مخاصوش يكون بوحدو. حقاش لا قدر الله وطلعات الأسعار لـ90 دولار شنو غادي تدير، وراه ضروري الحكومة خاصها تتدخل”.

وأضاف المسؤول الحكومي: “رئيس الحكومة قال على أن التسقيف صعب حقاش كاين ارتفاع فأسعار المحروقات دوليا وقصد أنه صعب فهاد الفترة، وميمكنش تقول للمغاربة أنك حددتي السعر لكن يلا الثمن وصل لـ13 درهم. راه هامش الربح مغاديش يكون عند الشركات. لكن يلا كانت الاثمنة دوليا طايحة غادي يكون التسقيف ساهل داك الساعة، وخاص المغربي يحس بهاد التسقيف”.

وتابع الداودي: “الملف ديال المحروقات موجود الآن على طاولة رئيس الحكومة ومن أولويات الأولويات. لي مقلق دبا هو أنه معرفناش فين غادية الأسعار دوليا وميمكنش تبقا كالس يلا مشا الله يستر وصل سعر البرميل لـ80 أو 90 دولار. وهادشي علاش رئيس الحكومة قال أن التسقيف صعب”.