كود اسماء غربي ///
توقعت مصادر ل”كود” ان يتم ترحيل احمد بنشمسي مدير التواصل والمرافعة بقسم الشرق الأوسط وشمال أفريقيا في هيومان رايت ووتش من الجزائر.
بنشمسي دخل للجزائر اللي فيها مسيرات اسبوعية مطالبة بالحرية والديموقراطية وانهاء تجربة حكم العسكر واخبار تحدثات على مصادرة هاتفو بعد ما وقفوه فالبدية.
السيد دخل يشوف واقع حقوق الانسان كيف كيدير فدول بحال المغرب وتونس٬ ولكن قررو وفق مصادر ل”كود” يرحلوه بتهمة الدخول بدون رخصة واكيد غاديين يزيدو عليها خدمة اجندة اجنبية.
هنا النظام الجزائري الحاكم اي الجيش كيدير بحال اللي دار السيسي فمصر. دارت هاد المنظمة الامريكية لحقوق الانسان تقرير علي فضايح الانتهاكات ناض اعلامو كيسبهم بل قرر انو اللي جا من المنظمة يمنعوه يدخل لمصر.
بنشمسي كان وصل للمطار ووقفوه واكيد مراقبينو ليل نهار وخداو ليه تلفونو وزيد وزيد.
المهم هيومان رايت ووتش فرشات نظام الجزائر. هاد النظام اللي كان خلى بنشمسي يدخل باش كان مدير نشر “تيل كيل” باش مشى للبوليساريو وكان عندو بحال اليوم باسبور مغربي. اش تبدل. ديك المرة مشى دار خدمة مهنية بان للجينرالات اللي كيحكمو وكانو اقوى بكثير من اليوم باللي غادي يعطي فرصة تبان صنيعتهم البوليساريو واليوم جا يدير علي حقوق الانسان وخافو وهما يديرو ما دار السيسي.
