علي الصافي – كود ///

هادي يومين بقات وكالة الانباء الاسبانية كتورد على نيد برايس الناطق باسم الخارجية الامريكية فقضية الصحراء. هاد الشي دارتو الوكالة قبل الاعلان البارح باللي رئيس الحكومة الاسبانية بيدرو سانشيث غادي يتلاقى بالرئيس الامريكي جو بايدن الاثنين الجاي.

الناطق باسم الخارجية الامريكية عطى جواب مختالف عن السابق شوية من موقف بلادو من قضية الصحرا. قال باللي ادارة بايدن كتواصل التشاور مع الاطراف باش يلقاو افضل السبل لانهاء العنف وتحقيق تسوية دائمة”. حتى هنا الامور مزيانة.

لكن المسؤول الامريكي زاد “ما عندي ما نزيد دابا ولكن كنتعارض على اللي كيقول باللي غادية تكون استمرارية” فسياسة الادارة الحالية فهاد الملف بما فيها نهجنا فالمنطقة منذ الادارة الاخيرة”. هنا كيهدر بشكل واضح واخا ما جبدهاش بالاسم على اعتراف ادارة ترامب بمغربية الصحراء فدجنبر الماضي.

هاد الاعتراف بمغربية الصحرا ماشي ضر وراه سطى الصبليون. فهاد الازمة ديال سبتة فكاع بلاطوات ديالهم فكاع نقاشاتهم كيرجعو لموقف امريكا من الصحرا.

هاد الشي علاش رئيس حكومتهم اللي استعمل لغة استعمارية مستفزة ضد المغرب اخيرا٬ ما خلى ما دار باش يتلاقى مع بايدن فزيارتو الحالية الى اوربا واللي بدات من بريطانيا البارح. غادي يشوفو الاثنين واكيد اهم موضوع غادي يجبدو معاه هو الصحرا.

اسبانيا باغية تخلي هاد الورقة ضغط كبير على المغرب وتحاول تبان باللي كتضغط على امريكا وكتقدم راسها قوة استعمارية.

مدريد كتقول وكتعاود: حنا مع اش دارت الامم المتحدة فالملف. طبعا كتضحك على المغرب. هاد المنظمة اللي كتهدر على حل سياسي وواقعي ما قدراتش تعين حتى مبعوث للصحرا باقي غير تلقى حل. المغرب باغي حل ولكن ماشي بالمفاوضات المباشرة.

المهم اسبانيا موظفة اوربا كلها باش تواجه المغرب. راه حتى اللقاء بين رئيس الحكومة ديالهم وبايدن يستحيل يكون كون ما كانش رئيس امريكا عندو اجتماع فبروكسيل مع قادة الاتحاد الاوربي وناس الناتو. شوفو رئيسهم خلى گاع مشاكل بلادو لكبيرة بزاف باش يضغط على الرباط.