احمد الطيب كود الرباط//

تسبب قرار وزارة الخارجية بإلغاء الحركة الانتقالية للسنة الجارية بالنسبة للموظفين في البعثات الدبلوماسية والمراكز القنصلية برسم سنة 2020، في غضب كبير لدى القناصلة لي حسو بـ”الحكرة” مقارنة مع الموظفين.

وثيقة حصلت عليها “كود” مؤرخة بتاريخ 19 ماي 2020، فيها دورية تنظيم الحركة الانتقالية لسنة 2020، كاتقول :”تماشيا مع السياق العالمي والوطني المتأثر بتداعيات انتشار كورونا، تقرر إلغاء الحركة الانتقالية الجارية 2020 بالنسبة للموظفين، وذلك ضمانا للسير العادي لمختلف البعثات الدبلوماسية والمراكز القنصلية للمملكة بالخارج، وكذا من أجل ضمان الظروف المواتية للاستقرار المهني والعائلي للموظفين المعنيين بالحركة الانتقالية، خصوصا فيما يتعلق بوضعية تمدرس أبنائهم سواء في المغرب أو في الخارج”.

الوثيقة اللي وقعها مدير مديرية الموارد البشرية فيها كذلك٬ انو خلال هذه السنة غادي تقتصر على إجراء بعض الانتقالات الضرورية والمحدودة، حين تتوفر الظروف الدولية الملائمة لذلك، لتعزيز البعثات الدبلوماسية والمراكز القنصلية لي كتعاني من النقص الحاد فالموارد البشرية، وتخفيض هاد الموارد بالنسبة لتلك التي تعرف فائض فالموارد البشرية.

نفس الوثيقة فيها ان الحركة الانتقالية الخاصة بالقناصلة العامو غاتكون نتائجها ابتداء ن فاتح شتنبر 2020 على حسب وضعية كل بلد من بلدان الاعتماد.

دبا بوريطة استنثى القناصلة، هادشي ماشي غير يقلقهم ويفقصهم. راه صطاهم٬ شي وحدين كيتساءلو :”واش هاد السياق العالمي كيأثر غير علي الموظفين وحنا اللا. واش هاد الاستقرار العائلي خاص غير بيهم. حنا ما عندناش ولاد ولا عائلات؟ ايلى جا هاد الانتقال ومشينا لبلاصة اخرى راه ولادنا اللي غاديين يتضررو. حنا غاديين نضررو معاهم”

القرار جاء فيه بلي الاجراءات الادارية لتسوية الموظفين المعنيين بالالتحاق بالادارة المركزية، بما في ذلك الاجراءات الاستثنائية التي ستمكن من تسوية الوضعية الادارية والمالية للذين ستتجاوز مدة عملهم لخمس سنوات بنفس المركز أو مدة ثمان سنوات متتالية بالخارج، هذا وسيتم الرجوع إلى تنزيل الاجراءات العادية للحركة الانتقالية ابتداء من السنة المقبلة 2021.

دابا واش هادا بعقلو هاد وزير الخارجية ناصر بوريطة مول هاد لفعايل. راه وضع استثنائي خاصو ياخد بعين الاعتبار كاع رجالات الخارجية.

حاجة اخرى تزاد فالتخربيق اللي كيديرو هاد الوزير فتدبير هاد المرة البيت الداخلي لوزارتو وهو كان كاتب عام وكيعرف هاد الشي مزيان ماشي جاي من بلاصة اخرى

هاد القناصلة تسخسخو وتشوهو فبعض الحالات مع هاداك التدبير الكارثي اللي دارتو وزارتو فقضية مغاربة حصلو برا٬ جازاهم بهاد القرار اللي كيزيد يضربهم ويسخسخهم وكيرفص هاد المرة وليداتهم ويقدر يؤثر بزاف عليهم