كود كازا//

بعد عملها فالفيلم القصير “شوك المحنة” اللي نتجاتو جمعية “جود” لإيواء المتشردين، قالت خديجة أسد أنها خدات الكثير من خلال المشاركة فهذ الحملة، من سعادة وارتياح، واعتبرات أن هذ العمل التطوعي ماشي خيري لكن واجب.

ووضحات، ففيديو فقناة “جود” على “يوتوب”: “كاع المتطوعين اللي خدمو معانا كاملين ماحسوش براسهم كيديرو عمل خيري، بل واجب”.

وأكدات أنه مايمكنش الإنسان يعيش فجو هو شبعان ففيه وواكل ووليداتو كيمشيو للمدرسة، وفنفس الوقت كيشوف ولاد خرين ضايعين.

وقالت: “انا ديما جاهزة وموجودة نشتغل مع اي حد عندو عمل من هذ القبيل”.

والانتاج دهذ الفيلم كيجي فإطار حملة كتديرها “جود” ضد تسول الأطفال، واللي شعارها هو “الخير اللي تدير فيه هو ماتعطيهش”، على اعتبار أن الصدقة على هذ الأطفال، اللي كيتم استغلالهم من طرف ناس كبار فالسعاية، كيمكن يشجعهم على البقاء فيها، وكيمكن هذشي يضيع حياتهم ومستقبلهم.