عفراء علوي محمدي- كود//

من بعد ارتفاع الإصابات الجديدة بفيروس كورونا المستجد فجهة فاس مكناس، وبحكم أن هذ الجهة عرفات أعلى نسبة ديال الإصابات اليومية بالمقارنة مع الجهات الأخرى فهذ اليوماين اللخرة، السلطات المحلية دارو مستشفى ميداني ففاس باش يستقبلو مرضى “كوفيد 19”.

هذ المستشفى غيهز 1200 سرير، وفيه جوج أجنحة دالرجال والعيالات، وفيه حتى فضاء ديال الرياضة والترفيه.

وهذ المستشفى غادي يحيد الضغط اللي كتعرفو السبيطارات بسبب ارتفاع الحالات المؤكدة، وكذلك الضغط فأقسام الإنعاش، وغادي يوفر أسرة إضافية للمصابين الجداد بالفيروس، كيف غيساعد على استئناف الخدمات فالمستشفيات بشكل اعتيادي بالنسبة لباقي المرضى اللي عندهم مشاكل صحية أخرى.

ولبارح سجلات جهة فاس مكناس إصابة 225 واحد بالفيروس، وهي اعلى نسبة إصابة بمورونا فالجهات، ومنه 201 حالة ففاس بوحدها.