نجوى المالحي- كود//

دنيا باطمة كتحتفل اليوم بعيد ميلادها لي في العادة كدير فيه الهرج والمرج، ولكن هاد السنة كان الوضع مختلف لي مخليها داخلة سوق راسها ومقاطعة انستگرام، وكتبان غير باش تنشر الدعوات.

هاد المرة دنيا اكتفت بفيديوهات كتغني ليها فيهم بنتها غزل عيد ميلاد سعيد، وبعض التهنئات القليلة لي حطوهم صحابها لي باقين على تواصل معاها رغم الأزمة لي كدوز منها بسباب تورطها هي واختها ابتسام في قضية حسابات “حمزة مون بيبي”.

دنيا حتى الفنانين لي موالفين كيرسلو ليها التهنئة وكتبارطاجيها في الستوريات على حسابها، دارو ليها قضية “تنسى كأنك لم تكن” خصوصا أنها مسحات كاع الفنانين من عندها، حيت زعما ما تضامنوش معاها في المحنة وهي راه القضية غارقة وفي يد القضاء.