عفراء علوي محمدي- كود//

اعتذرات الهيئة الوطنية للأطباء على إعلانها لحالة وفاة ثالثة لطبيب بمدينة مراكش بفيروس كورونا المستجد، قبل ما تتأكد بللي هذ الخبر ماشي صحيح.

الهيئة الوطنية للأطباء قللت، فبيان ليها توصلات “كود” بيه، بللي مكانش عليها تزرب فنقل هذ المعلومة بلا ما تتحقق، وتمنات الشفاء للطبيب اللي مريض فعلا بالفيروس.

وفنفس البلاغ، نعات الهيئة الطبيبين اللي ماتو بالفيروس فعلا، وكيتعلق الأمر بطبيبة فقطاع الطب الشغل فكازا، وطبيب عام متقاعد فمكناس.

وقالت بللي المتوفين “من خيرة ابناء الوطن، وتعرفو بأخلاقهم وحسن سلوكهم اللي خلاهم يكسبو حب الجميع، وكانوا مخلصين فالعمل ديالهم”، وعزات الأسر ديالهم، واعتبراتهم “شهداء الواجب الوطني”، على حساب البلاغ دائما.