وكالات //

النجم البرتغالي كريستيانو رونالدو، مهاجم فريق مانشستر يونايتد الإنكَليزي لكرة القدم، عطى وعد باش يخلص الخسائر اللي تسببات فيها الكسيدة اللي دار الكَاردكور ديالو بطوموبيلتو من الماركة الطاليانية “بوكَاتي فيرون” (Bugatti Veyron)، فالصباح ديال نهار الإثنين الفايت.

الطوموبيل ديال رونالدو ساوية 1.7 مليون جنيه إسترليني، وواحد من ليكَاردكور ديالو واحد الوقيتة فاش كان سايكَها، وهو فطريقو جايبها لرونالدو اللي كيدوز حاليا عطلتو الصيفية مع فاميلتو جزيرة مايوركا الإسبانية، مابقاش قدر يتحكم فالديريكسيون ودخل فدار ودكَدكَ طرف منها، وخصوصا الماكَانة ديال الما.

وقال مول الدار اللي تضررات فتصريحات لجورنال “Ultima Hora” اللي كيصدر من مايوركا : “مشيت لدار رونالدو، واستقبلني راجل وواحد المرا ضريفين بزاف، وتعتملو معايا مزيان ووعدوني نيابة على كريستيانو بللي غيخلصو كَاع تكاليف كل الأضرار اللي وقعات لداري بسباب كسيدة البوكَاتي”.

وزاد كَال: “خبروني باش نحافظ على الفاكتورات بعدما نصلح كلشي باش يعوضوني من بعد”.