كود سبور//

قامت الجامعة الملكية المغربية لكرة السلة بتوقيف النجم السابق ديال السلة المغربية والإطار الوطني الحالي مراد الفنجاوي، لتعبيرو على الرأي ديالو بخصوص المنتخبات الوطنية ومشاركة المنتخب المغربي فدورة ألعاب التضامن الإسلامي الجارية بتركيا.

مراد الفنجاوي المدرب السابق ديال الوداد الرياضي وفتصريح لـ “كود” قال أنه نشر تعليق بالحساب ديالو فموقع التواصل الاجتماعي “فيسبوك” عبر من خلالو على الرأي ديالو بخصوص مشاركة المنتخب الوطني المغربي فبطولة التضامن الإسلامي وإشراف مدرب واحد على 3 فئات ديال المنتخبات الوطنية.

الفنجاوي قال خلال التصريح ديالو أنه من بعد مرور تقريبا أسبوع أو 10 أيام على التعليق ديالو، تفاجأ بتوصل نادي الوداد الرياضي فرع كرة السلة، بمراسلة من الجامعة تؤكد من خلالها توقيف “المدرب مراد الفنجاوي” لمدة ديال 3 سنوات.

وعبر مراد الفنجاوي عن استغرابو من هذا الإجراء، وخصوصا وأنه عبر فقط على رأيو بكل احترام وهذا حق يكفله له الدستور المغربي، وأيضا لأن الجامعة الملكية المغربية لكرة السلة كان عليها تستدعيه للمثول أمام اللجنة التأديبية التابعة لها من أجل التأكد من صحة المنسوب إليه قبل إصدار العقوبة فالحق ديالو، وهو الاجراء الذي لم يتم.

النجم السابق ديال الرجاء والمدرب السابق ديال الوداد قال فالتعليق ديالو: “تحية رياضية للإدارة التقنية نفس المدرب لعدة منتخبات خدمة نقية او لخبار فراسكم التساؤل لي عندي واش هاد المشروع ديال الإدارة التقنية مستوحى من الشراكة لي درنا مع إسرائيل مكنضنش تا لیهود معندهمش هاد الكفاءة . والحصول را مکاینش بحال الجامعة ديالنا النزيهة”.

وأوضح مراد الفنجاوي أن التعليق ديالو جاء بدافع الغيرة على المنتخب المغربي والسلة الوطنية، مشيرا إلى أن اتفاقية التعاون لي وقعتها الجامعة الملكية المغربية لكرة السلة مع الاتحاد الإسرائيلي للعبة مهمة، ويجب الاستفادة منها.

واستنكر مراد الفنجاوي القرار الصادر فالحق ديالو من طرف الجامعة الملكية المغربية لكرة السلة، بالتوقيق ديالو لمدة 3 سنوات، وأكد على أن الدستور ديال المملكة المغربية يكفل له حرية التعبير، وأنه عبر على الرأي ديالو حبا للوطن وحبا للمنتخب الوطني المغربي ولكرة السلة وغيرة عليه، مشددا على أنه غيدافع على الحق ديالو وماغيسكتش.