عفراء علوي محمدي- كود//

من بعد ما وضع العاصمة الفيليبينية مانيلا فالحجر الصحي، آمر الرئيس الفلبيني، رودريكَو دوتيرتي، الجنود ديالو والسلطات الأمنية، باش يتيريو فأي واحد خارج من الدار ومكون مجموعات، حيت ملتازموش بالشروط والمعايير الوقائية من فيروس “كورونا” المستجد.

فواحد المؤتمر صحافي، لبارح الأربعاء، عطا الرئيس الفلبيني الأوامر ديالو للعسكر والبوليس باش اي واحد مامحترمش القوانين فهذ الفترة، “أنا كنعاود نذكركم بالموقف الصعيب اللي حنا فيه، وأنا كنتحمل مسؤوليتي، وكنطلب من العسكر يتيريو بالقرطاس فالناس باش مايخرج حتى شي حد مازال”، كيقول دوتيرتي.

وزاد كيقول، بلهجة قاصحة: “واش كاتفهمو؟ الموتى فبلاصة ما يوقعو مشاكل أكبر، وغادي تكلف أنا بالدفن ديالهم”.

وماشي هذي أول مرة الرئيس الفلبيني كيعطي أوامر دموية بحال هذي، حيت كان سبقليه قبل آمر العسكر ديالو بتش يقتلو اللي كيتاجرو فالمخدرات، وهذشي خلف آلاف القتلى.