سهام البارودي – كود//

قضية سعيد عويطة و باه ! خلاتني نفكر فمفهوم العلاقة  بين الواليدين و الأبناء و كيفاش  بزاف ديال المغاربة كايتصوروها !

أي عائلة مزلوطة كاتلقاها غير كاينجح شي واحد فيها كايصوفي راسو ! خاصهم كلهم يلصقو فيه !  و ماشي غير كايلصقو فيه و صافي و لكن كايصحابهم راه مفروض عليه يعاونهم ! و مفروض عليه حيت هوا دار لاباس يديرو معاه تاهوما لاباس !
سيفط مك للحج ! سيفط باك للعمرة ! دير حانوت للفاشلة دختك ! شري دار للمزلوط دخوك ! سلف الحازقة د عمتك !
بنادم عندنا فالمغرب غير كايهز الراس شوية ! ماكايخليوهش يربي الريش و يطير ! لا كايگلسو لمك على داك الريش و ينتفوه ليك تاكاتصدق ماطاير نتا ماطايرين هوما ! و فاللخر كاتشدو كلكم الأرض .
غير كاتنفس شوية ! و كايخرجو ليك من الغيران ! كاتلقا دار فيها مانضة وحدة و كلشي باغي يعيش بديك المانضة ديال الخو و لا الخت ! و تاواحد ماباغي يدير شي حاجة فحياتو و يصوفي راسو ! كلشي معول على ” عزيز ” و لا على ” سعيدة” و لا على ” عبد الكريم ” ! كاتلقى سمية وحدة لي كاتعاود و كاينة و كلشي منها ! و كلشي كايساين مول ديك السمية يفورني على طاشمة ديال الخلق! ها لي باغي يصبغ الحيوط ! ها لي باغي يكري طاكسي ! ها لي خاصو يركب فم !

الآباء لي آباء ديال بصح و عندهم الحب ديال الآباء لولادهم و عندهم النفس ديال الآباء مع ولادهم ! راه ماكايبنيوش العلاقة بينهم و بين ولادهم على الفلوس و المادة ! نتا اب ! اصلا باش تجوج و تفكر دير الولاد راه خاصك تكون قاد بيهم و عندك استقلالية مادية عليهم ! طبعا خاصك تصرف عليهم تايكبرو حيت نتا لي جبتيهم للحياة و مسؤول عليهم ! و فاش يكبرو خاصك تكون عندك الاستقلالية المادية لي تخليك نتا تعيش بلا ماتمد يديك ليهم و هوما يعيشو بلا مايمدو يديهم ليك باش يبقا الاحترام و الحب بين الاسرة.
ديك شي لاصق فشي ! شي داكو فشي ! شي معول على شي راه كاتولد غير الحقد و عدم الاحترام و الانانية !

الآباء المگودين ! لي عندهم النفس ! نورمالمو ! ماخاصهمش يرضاو بفلوس ولادهم ! خاصهم يكونو مستاقلين ماديا و عايشين بداكشي لي قدو عليه ! و حتى لاكانو ماعندهمش مدخول قار ! يكونو على الاقل بنفسهم ماشي باسلين! و طبعا لاكانو مكبرين ولادهم على الحب و الاحترام راه تاواحد ماغايخلي واليديه يسوفريو ! و حتى واحد نورمال كايحس بلي واليديه كايبغيوه و باغين ليه الخير ماغايخليهم بلاش.

ايه طبعا تقدر تسيفط واليديك للحج ! و تشري ليهم الدار! و تكسيهم و تسبطهم و تغرقهم كادويات و تسفرهم و تبغي تفرحهم و شكون ماغايبغيش يفرح مع واليديه ؟! و لكن تكون بااااغي دير هادشي و ديرو عن حب و يجي منك نتا ! ماشي حيت كايبتززوك ماديا و لا عاطفيا !
لاكان باك و مك كايبتززوك ماديا و عاطفيا! راهم ولاد القحاب مقطرين ! ماشي اباء ! غير خراوك واحد النهار باش تصوفيهم.

شحال من أب كايولد الولاد ماشي حيت باغيهم لا حيت باغيهم يخدمو عليه و يصرفو عليه و يقسمو معاه المانضة ! شحال من أب غير كايخدم ولدو كايزيدو لشي كريدي باش يبني ليه الدار ! و لا غير كاتخدم بنتو كايلصق فيها خوتها  و كاتولي هي لي خاصها تصرف عليه و على ولادو  ! و شحال من أم كاتقوليك ” و مالو !ولدي يتجوج  بشي وحدة دي ليه المانضة كاملة ! وانا ؟ شنو يشيط ليا لا خاصني نزيدو لشي كريدي خاصو يعطيني خاصو يبني معايا الدار ؟” و شحال من أم غير كاتخدم بنتها كاتبغي تحقق گاع داكشي لي كانت محرومة منو على ظهرها.

شي كايبغي يدكو فشي ! شي كايطمع فشي ! هادشي كايخلي العلاقات ماتبناش على الاحترام و الحب بل تبنى على المصلحة المادية و الابتزاز العاطفي و ماعمر العلاقات لي كاتبنى بهاد الطريقة ماكايكون فيها الربح !