كود الرباط //
ناضت قربالة فالبرلمان على مداخلة نائب برلماني من حزب التجمع الوطني للأحرار بعدما قال بللي البرنامج الحكومي خدا موافقة “جلالة الملك” حسب تعبيره، هادشي خلا نواب من لمعارضة ينوضو ويحيحو ويقولو ليه: “سيدنا ديال المغاربة كاملين و ماشي معقول نقولو سيدنا صادق على البرنامج الحكومي”.
البرلماني من الأغلبية كان باغي يوصل فكرة بللي ارتفاع الأسعار ماشي مسؤولية الحكومة، ولكن عورها فاش قال بللي “البرنامج الحكومي خدا الموافقة ديال جلالة الملك”، هنا خدا النائب محمد أوزين نقطة نظام وقال: “ما لا يمكن أن نختلف عليه هو أن سيدنا ديال الأغلبية والمعارضة، ولا يعقل نواب يقولو جبنا برنامج وصادق عليه سيدنا”.
كلمة أوزين خلات الجلسة ترون، و”الأحرار” ماعجباتهمش هاد المزايدات على كلمة نائب برلماني يقدر يكون خاطئ.
من جهته طالب إدريس السنتيسي، رئيس فريق الحركة الشعبية بمجلس النواب، طالب من النائب فحزب “الحمامة” يسحب كلامو بخصوص إقحام الملك فالموضوع اللي تكلم عليه.
