الرئيسية > آراء > برافو على أي راجل مساند مراتو فمعركة السرطان ! حيت لاسولوتو الناس لي خدامين فالمستشفيات غايگولو ليكم على شحال من رويجل كايسمح فمراتو و شحال من رويجل كايتعامل معاها لا مرضات فحال شي طوموبيل تقرقشات خاصو يكركبها و يخرج وحدة دوبلفي
12/09/2019 14:00 آراء

برافو على أي راجل مساند مراتو فمعركة السرطان ! حيت لاسولوتو الناس لي خدامين فالمستشفيات غايگولو ليكم على شحال من رويجل كايسمح فمراتو و شحال من رويجل كايتعامل معاها لا مرضات فحال شي طوموبيل تقرقشات خاصو يكركبها و يخرج وحدة دوبلفي

برافو على أي راجل مساند مراتو فمعركة السرطان ! حيت لاسولوتو الناس لي خدامين فالمستشفيات غايگولو ليكم على شحال من رويجل كايسمح فمراتو و شحال من رويجل كايتعامل معاها لا مرضات فحال شي طوموبيل تقرقشات خاصو يكركبها و يخرج وحدة دوبلفي

سهام البارودي – كود//

مازال مابغاوش يتفهمو ليا دوك لي جاتهم غريبة الصورة ديال حاتم عمور و مراتو لي مريضة بالسرطان ! و كايتعاملو معاها فحال شي حاجة عادية زعما موالفين بالخير حنا ! گاليك آ سيدي علاش كاتهللو و طبلو لحاتم عمور راه دار ” غي لي عليه” ! أنا شخصيا جاوني لي كايگولو هاد الهضرة يا ايما ماعايشينش فالمغرب يا ايما هبال عايشين فالمغرب و ماعارفينش باشمن ما معجونين ناسو و خصوصا شريحة كبيرة من الرجال ديالو !

فمجتمع فحال ديالنا ! فين مازال الراجل  كايگوليك ” وا نوض نتجوج واخا نلقا غي لي تصبن ليا ” و ” بغينا نتجوجو واخا غا نسخنو فالبرد ” ” و الواليدة كبرات خاصني نجيب ليها شي وحدة تعاونها “و لاماتت ليه المرا كايتجوج من العزايات !  فمجتمع عوج كايشوف المرا كأكسيسوار كايأثت بيه الراجل حياتو الاجتماعية و الجنسية راه داكشي لي دار حاتم عمور مزياااان و مزيااان بزاف !  على الاقل غي  تصويرة يشوفها بوزبال فلانستاغرام تخليه يخمم شي شوية فحالتو مع مراتو !

الطبيبات و الممرضات و الناس لي كايخدمو فالمستشفيات عارفين شحال المرضى كايعانيو من تخلي عائلاتهم عليهم ! شحال من مرا كاتمرض و يلوحها الراجل فالسبيطار و يزيد !

العيالات المسكينات لي كايلقاو راسهم في معركة مع الكونصير ! ربات البيوت لي كايوحلو بين المرض و الدوا و الدراري و الرويجل لي يقدر مايرحمهاش و لا يعيفها و لا يلوحها و لا و لا و لا …

ايه كاينين ولاد الناس و كاينين بنات الناس و كاينين الريجال المسؤولين لي عارفين بلي الجواج مسؤولية اتجاه الزوجة و اتجاه الابناء ! و لكن بالمقابل كاينين جيوش ديال بوزبال لي غا لاصبحات مراتو فيها الحلاقم كايبقا يگمگم عليها ” و نبقا انا بلا فطووووور و لا كيفاش ؟!”

و يجي واحد راسو مربع و لا وحدة ماعندهاش الجمجمة تگوليك ” ويلي ! علاش جاتكم عجب تصويرة حاتم عمور مع مراتو ؟ عادي”

ايه طبعا عجب فبلاد لي مازال بزاف ديال العائلات كايسميو الكونصير ” المرض الخايب” و ماكاينطقوش تا سميتو و كايتخباو و يخافو يتعرف عليهم بلي عندهم مريض بالكونصير فحالا صابتهم لعنة الآلهة ! و فبلاد لي مازال الراجل كايتعامل مع المرا فحال شي طوموبيل خداها نهار كاتقرقش كايقلب يكركبها و يخرج شي وحدة دوبلفي !

العامل النفسي مهم بزاف فمعركة السرطان ! و المرضى محتاجين لعائلاتهم و لناسهم يوقفو معاهم و يساندوهم ماديا و معنويا ! هادشي علاش اي مظهر من مظاهر التضامن مع هاد الناس كايبقى مطلوب و بالخصوص من فنان عندو شريحة كبيرة ديال المتابعين

موضوعات أخرى

28/03/2024 07:00

سمية الخشاب دخلات طول وعرض فبرنامج الكاميرا الخافية ديال رامز جلال: هادي جريمة كيعاقب عليها القانون

28/03/2024 03:00

السروال ديال مقدم برنامج بريطاني داير أزمة فكوريا الجنوبية.. ها شنو دارت القناة ديالهم- فيديو

28/03/2024 02:00

مصور عندو 71 عام اتاهم الوالد ديال تايلور سويفت أنه تعدا عليه بالضرب ملي كان كيصورها

28/03/2024 01:00

هجوم موسكو الارهابي.. 95 شخص ما زال مفقودين وروسيا كتشكك فان داعش هي اللي دارت هاد الهجوم