كود ياوندي ///
رئيس الاتحاد الافريقي لكرة القدم انفانتينو طالع ليه الدم من الكاميرون. هاد الشي بان من خلال رحيلو مباشرة بعد افتتاح الكان الافريقي يوم 9 يناير الاخير. السيد غير سالى الحفل اللي كان حاضر ليه رئيس الدولة الكاميرونية بول بيا، وهو يهز طيارتو =طيارة الفيفا= ورجع لمقر هاد الاتحاد فسويسرا.
يعني انو نعس فالطيارة. هاد الشي عندو علاقة بكل ما اثير عن تنظيم هاد الكان وعن اتهام رئيس الجامعة الكاميرونية ايطو للفيفا وللمغرب ولمصر برفض تنظميها فهاد الوقت. واخا خرج عضو المكتب التنفيذي للكاف ورئيس الاتحاد السينغالي لكرة القدم وقال باللي هاد الشي ما كانش. بقات الامور ماشي حتى لهيه.
الصحافة الكاميرونية هدرات على “تعرض رئيس الفيفا للاهانة” باش ما بركش حتى الرئيس بول بيا، واخا كاينة صورة بيناتهم فالقصر الرئاسي.
فياوندي حتى مقر الكاف اللي فيه اعضاء اللجنة التنفيذية وهو فندق هيلطون، ما كاين حتى حد كيتسوق ليهم، لا سكرتارية لا بروطوكول لا اهتمام.. كلها ويديها فراسو. يمكن هاد لشي اللي ما بغاش يعيشو رئيس الاتحاد الدولي لكرة القدم.