https://web.facebook.com/watch/?v=1814003195453322&extid=NS-UNK-UNK-UNK-IOS_GK0T-GK1C&_rdc=1&_rdr
مصطفى المزابي -كود سطات //

كثار ناس مزاب اللي من راس العين الشاوية بدائرة بن احمد الجنوبية ولاو يحشمو يمشيو للسوق نهار السبت “كنفضل نتسوق فالاثنين بابن احمد. سوق كيحتارم اللي كيزورو واخا مولفين فالماضي فالعائلة نتسوقو فراس العين حيث هو لقريب” يحكي سعيد ل”كود”. هادا ولد دوار قريب من الجماعة. عايش فهاد الدوار وكيبان ليه راس العين “غادية وكتكفس”.

المنطقة اللي فيها الجماعة والقيادة وطبعا السوق ولات مزبلة كبيرة. لا گرنة كتحتارم الناس لا ترياش الدجاج كيدار كيف خاصو يدار “راه مكرفصين بزاف مع لوسخ مع الريحة مع لخنز” يوضح ل”كود” حداد عندو محل فوق السوق.

اللي كيضر ناس المنطقة كثر هو ان جوج سواق قراب ليهم وهما لخميس بسيدي حجاج والاثنين ببن احمد تقدمو بزاف. ماشي غير السواق حتى المدن ولاو مقادين. فيهم قواهي محترمة وفيهم زناقي تقدم تسميهم زناقي وفيهم تنظيم ماشي طوب ولكن متوسط حتى لا بأس به. ماشي بحال راس العين كلها وسخ وعفن وبنية تحتية مقتولة.

الغريب ان هاد الجماعة شادها اتحادي. طبعا ماشي اتحادي الزمن الجميل. اتحادي اي كلام وصافي. اسمو البهلول رئيس الجماعة. خداها. المدينة كل سنة كتبعد على مظاهر التمدن. حتى قرية ما بقاتش. ولات موسخة وصافي.

مركز جماعة راس العين اللي ما بقاش يغري امثال سعيد يزوروه وكيفضلو يتقهواو باش يبغيو يبعدو من روتين لعروبية٬ يمشيو لابن احمد او سيدي حجاج. ما يمكنش يجيو لمركز ما فيهش بنية تحتية. ما كيغري حتى حد يدير استثمار شي قهوة مزيانة …

دابا كاينة دعوات فوسائل التواصل الاجتماعي باش ناس المنطقة يديرو تغيير. عندهم فرصة مع الانتخابات. ترك مركز بهاداك لوسخ وتمشي دير ليه لعكر من خلال مهرجانات راه غباء فغباء. المركز محتاج للفرح للموسيقى للحياة. هادا اكيد. ولكن محتاج فنفس الوقت لواحد ما يدير والو غير ينقي مدينة لسكان صوتو عليه.