كود – وكالات//

الخطوط الجوية القطرية نظمات أول رحلة فالعالم، كيتعتبرو 100 فالمية دمسافريها ملقحين ضد فيروس كورونا المستجد، اليوم الثلاثاء.

وشاركو فهذ الرحلة الخاصة، للي أمناتها طائرة إيرباص A350-1000 حوالي 188 راكب، وماكانت عند الرحلة حتى وجهة، بحيث دارت الطيارة دويرة فوق دبي وفالمجال الجوي دعمان ورجعات.

والرحلة كان مخطط لبها قبل، وتسمات ب”أول رحلة فالعالم ركابها كاملين واخدين اللقاح”، انطلقات من الدوحة مع 11 دالصباح ورجعات ليها مع 2 دالعشية، بالتوقيت المحلي.

وكَاع الركاب، وحتى الموظفين ديال الرحلة كانو ملقحين، وحتى التسجيل دالركاب اللي الدار قبل الإقلاع تم من طرف فريق كلو واخد الجرعات ديالو.

واستفدو الركاب من موني غذاء فخم، وشهادة المشاركة فالرحلة وكذلك هداية رمزية، والرحلة كلها كانت للبريستيج وصافي.